सबल बहाःया नासःद्यःया देगः जिर्णोद्वार लिपा उलेज्या
येँ- येँ महानगरपालिका वडा नं. २१ सबल बहालय् च्वंगु निसः दँ स्वयां पुलांगु नासःद्यःया देगः जिर्णोद्वार लिपा उलेज्या याःगु दु । येँ महानगरपालिकाया प्रमुख विद्यासुन्दर शाक्यं सबल बहालय् च्वंगु २१४ दँ पुलांगु नासःद्यःया देगः पुनःनिर्माण लिपा उलेज्या यानादीगु खः ।
देगः उलेज्या यासें येँ महानगर प्रमुख शाक्यं येँ महानगरपालिका सम्पदा संरक्षण व पुनःनिर्माण अभियानय् निरन्तर लगे जुयाच्वंगु दु धासें कला, संस्कृति, सम्पदाया संरक्षण व संवद्र्धनया निंतिं योजनावद्ध रुपं थःपिं न्ह्याः वनाच्वनागु खँ कनादिल ।
‘थाय्या ल्याखं थुगु भेगयात क्वःने धकाः धाइ, तर आः वयाः थ्व थाय् विकास जुजुं वनाच्वंगु दु’, महानगर प्रमुख शाक्यं धयादिल ‘न्हापा सबल बहाः वइपिं न्हाय्प्वाः तिनाः वयेमाः, आः थःपिं सबल बहाःया नागरिक धायेबलय् गर्व याये फइगु अवस्था वःगु दु । थुकिया गौरवयात ल्यंका तयेत आर्थिक समृद्धि यायेमाः ।’
‘आर्थिक समृद्धि जुल धाःसा थःपिनि थातथलो बियाः मेथाय् च्वं वने मालीगु अवस्था वइमखु ।उकिया निंतिं दकलय् न्हापां सकलें दाजुकिजापिं मिले जुइमाः अले छेँजःपिं मिले जुयाच्वनेमाः’ वय्कलं धयादिल ।
पुलांम्ह मन्त्री कृष्णगोपाल श्रेष्ठं २०७२ सालया भुखाचं क्षति जूगु मरुसतः, मेमेगु देगः, मठमन्दिर, फल्चा, सतः, चैत्य, बहाः दक्वं थौंकन्हय् येँ महानगर प्रमुख शाक्यया नेतृत्वय् पुनःनिर्माया जुयाच्वंगु गर्व यायेबहगु खँ खः धयादिल ।
‘वय्कःया हे नेतृत्वय् १ निसें ८ तगिं तक नेपालभाषां ब्वंकेगु ऐतिहासिक ज्या जूगु दु’, श्रेष्ठं धयादिल, ‘अथे हे येँ देय्यात बांलाकेत सरसफाइया निंतिं आधुनिक मेशिनत नं हयेगु ज्या जुयाच्वंगु दुसा आः आधुनिक दमकल नं हयेगु जुयाच्वंगु दु । मेयर शाक्यं थःगु कार्यकालय् गुलि महत्वपूर्ण ज्या याःगु दु धइगु खँया दसु थ्व हे सबल बहाःयात जक स्वःसां सीके फइ ।
देगः जिर्णोद्वार समितिया अध्यक्ष लक्ष्मीनारायण पोडें नेपाल संवत् ९२७ सालय् उगु नासःद्यःया देगः निर्माण जूगु जानकारी बियादिसें देगः जीर्ण जुयाः दुना वनीगु अवस्थाय् थ्यगु धार्मिक सम्पदायात येँ महानगरपालिका हनुमानध्वाखा दरवार संरक्षण क्षेत्रया आर्थिक ग्वाहालिं पुलांगु हे अवस्थाय् हयेत ताःलाःगु धासें लसता नं प्वंकादिल । उगु देगः येँ महानगरपालिकां ४८ लाख लागतय् जिर्णोद्वार याःगु खः ।
LEAVE YOUR COMMENTS