ह्वाइट हाउसय् स्वांयाःपुन्हि हन

येँ(नेपालभाषा टाइम्स)- अमेरिकी राष्ट्रपति भवन ह्वाइट हाउसय् थुगुसी नं स्वांयाःपुन्हिया लसताय् छगू तःजिगु ज्याझ्वः जुल । थुगुसी स्वक्वःखुसी अमेरिकी राष्ट्रपति भवन ह्वाइट हाउसय् २५६७ क्वःगु स्वांयाःपुन्हिया लसताय् ज्याझ्वः जूगु खः ।

अमेरिकी उपराष्ट्रपति कमला ह्यारिस, वय्कःया जहानलिसें सेकेन्ड जेन्टलम्यान डग्लस क्रेड एम्होफ, थेरवाद, महायान व वज्रयानया भिक्षु, लामा गुरुपिंसं मंकाःकथं शान्तिदीप प्रज्वलन यासें ह्वाइट हाउसय् स्वांयाःपुन्हि हंगु खः ।

इन्टनेशनल बुद्धिष्ट एशोसिएसन अफ अमेरिकाया अध्यक्ष वांग्मो डिक्सेया संयोजनय् जूगु ज्याझ्वलय् अमेरिकाय् च्वनाच्वंपिं थाइल्याण्ड, कोरिया, तिब्बतया बौद्ध भिक्षु व लामा गुरुलिसें राष्ट्रपति भवनया कर्मचारीतय्सं बुद्ध प्रार्थनालिसें बुद्धपुजा याःगु खः ।

ज्याझ्वलय् नवासें सेकेन्ड जेन्टलम्यान एम्होफं अमेरिका थेंज्याःगु लोकतान्त्रिक देशय् बौद्ध धर्मया स्वंगुलिं निकायपाखें बौद्ध परम्पराकथं स्वांयाःपुन्हि हनेगु धइगु तःधंगु उपलब्धि खः धासें आः स्वांयाःपुन्हि हनेगु जक मखु बुद्ध शिक्षा व बुद्धया उपदेशयात नं प्रतिविम्बित यायेमाःगु ई वःगु धयादिल ।

एशोसिएसनया अध्यक्ष डिक्सें नं नुगःखँ तयादीगु ज्याझ्वलय् अमेरिकाया निंतिं नेपाःलिसें थाइल्याण्ड, कम्बोडियाया राजदूत नापं भारत, इन्डोनेशिया, मंगोलिया लगायतया देय्या प्रतिनिधितय् उपस्थिति दुगु खः ।

बुद्ध संवत् २५६५ (सन् २०२१) निसें राष्ट्रपति भवन ह्वाइट हाउसय् औपचारिक रुपं स्वांयाःपुन्हि हनेगु शुरु याःगु खः । उगु इलय् १० गू लख दीप प्रज्वलन नं याःगु खःसा राष्ट्रपति जो बाइडेनं भिंतुना सन्देश नं बियादीगु खः ।

राष्ट्रपति बाइडेनं थुगुसी नं भिंतुना सन्देश बियादिसें अमेरिकाय् बौद्धतय् योगदान लुमंकेहजू धासें देय्यात समृद्ध यायेगु खःसा बौद्ध शिक्षा आवश्यक दुुगु खँ धयादीगु दु ।