मेयर साह व अभियन्ता जवाःसवाः

येँ (नेपालभाषा टाइम्स)- येँ महानगरपालिकाया मेयर बालेन साहं सभागृह न्ह्यःने न्हय्न्हु न्ह्यवंनिसें दनाः धर्ना बियाच्वंपिं अभियन्ता ‘ई’ यात वार्ताय् सःतूसां मवः धकाः सामाजिक सञ्जालय् पोष्ट याःगु दु । तर अभियन्तातय्सं धाःसा साहं थःपिंत वार्ताया नितिं सःतूगु पहः हे मिले मजूगु खँ धाःगु दु ।

मेयर साहं सामाजिक सञ्जालय् च्वयादीगु दु, ‘वंगु छुं न्हि न्ह्यवंनिसें छुं अभियन्तात आन्दोलनय् दु, वय्कःपिनि खँ न्यनेत वय्कःपिं दनाच्वंगु थासय् जि थः हे वनाः वार्ता याये नु, छिकपिनि खँ व समस्या न्यने धकाः अभियन्तापिंत संवादय् सःता, तर वय्कःपिं वये चाहे मजू, लोकतान्त्रिक अभ्यासय् फुक्कं खँया समाधान संवादं हे जुइमाः धइगु खँ जिमिसं थू, सायद गुगुं राजनीतिक स्वार्थ लिसे स्वानाः मवःगु खः ला । छु वार्ता जिमिसं वय्कःपिनि नेतातलिसे हे यायेमाःगु ला ?’

मेयर साहं अभियन्तातय्त वार्ताय् सःतूगु धाःसां अभियन्तातय्सं धाःसा म्हिगः थःपिंत महानगरया छम्ह प्रहरी वयाः मेयर साबं थःपिंत मालाच्वंगु दु धकाः खबर याः वःगु खँ धाःगु दु ।

उगु इलय् अभियन्तां ‘ईं’ प्रहरीयात लिसः बिल, ‘वार्ता यायेत जिपिं तयार दु, म्होतिं छघौया ई माल । जिमिगुपाखें कानुनी जानकार व सहरी विकासया जानकार पासापिं वयेमानि ।’ वयां लिपा नगर प्रहरीं आः नापलायेगुसा नाप लायेमाल मखुसा मेयरं नापलाइ मखु धकाः तप्यंक लिसः बिया वन ।

अभियन्ता ईं थःपिं वार्ताया निंतिं तयार दुगु तर मेयर साहं धाःसा वार्ताया निंतिं सःतागु खःसां वार्ताय् मवः धकाः प्रचार यायेत वार्ताया नाटक याःगु द्वपं बियादीगु दु, ‘हक्काः सःतेगु, मवल धाःसा नापलाइ मखु धकाः ख्याच्वः बीगु थ्व सनक प्रवृत्ति हे खः ।’