सरस्वती प्रधानयात हानं ज्वनेमाःगु माग बदर

येँ – जातीय विभेद तयाः थःत क्वथा बालं मबिउ धासें सर्वोच्चय् रिट तयादीम्ह रुपा सुनारया स्वंगुलिं मागयात सर्वोच्च अदालतं अस्वीकार याःगु दु । सुनारं थःगु रिटय् बबरमहलया सरस्वती प्रधानयात हानं ज्वनाः कुने माःगु, तत्कालीन मन्त्री कृष्णगोपाल श्रेष्ठयात पदच्युत यायेमाःगु व प्रहरीयात थःगु मोबाइल फोन बीके मबीमाःगु माग यानादीगु खः । सर्वोच्चं म्हीग जारी याःगु आदेशय् थ्व स्वंगुलिं मागयात अस्वीकार याःगु दु ।

सर्वोच्चं प्रधानया सवालय् २५ न्हु तक छानबिन यायेगु, पूर्व मन्त्री श्रेष्ठया सवालय् मुद्दा दर्ता यायेगु व सुनारया मोबाइलया सवालय् शर्त सहित अदालतयात मोबाइल बीमाःगु आदेश जारी याःगु खः ।

प्रधानया पक्षं वहस याःपिं वकिलतय्सं तत्कालीन मन्त्री कृष्ण गोपाल श्रेष्ठं प्रधानयात छुटे याः वंगु मखु, छुटे जूम्ह मनूयात गाडीइ तया यंकूगु जक खः, थ्व ज्या न्ह्याम्ह मनुखं नं यायेफु, न्यायाधीश थम्हं नं यायेफु धकाः तर्क तयादीगु खः ।

अथे हे वय्कःपिंसं सुनार धइपिं लुँज्या याइपिं खः, नेवाः समाजय् लुँज्या याइपिंत शाक्य वा बाडे धाइ, उमित नेवाः समाजं गबलें नं अपमान याःगु मदु, उकिं सुनारयात नं अपमान याइगु खँ हे मदु धकाः नं तर्क तःगु खः ।

अथे हे सुनारं प्रधानलिसे जूगु खँल्हाबल्हाया टेप सार्वजनिक याःगु कारणं थुकी सुनारयात कपी राइटया द्वपनय् समेत सजाय बी जिउगु दावी नं याःगु खः । अदालतं थ्व बारे जातीय द्वेष न्यना वनी कथंया समाचार मच्वयेत नं आदेश बिउगु दु ।

प्रधानया पक्षय् सकारात्मक आदेश
थुगु मुद्दाय् सरस्वती प्रधानया पक्षं वहस यानादीम्ह अधिवक्ता विजयराज शाक्यं म्हीग अदालतं बिउगु आदेश प्रधानया पक्षय् सकारात्मक खः धयादीगु दु । निवेदक रुपा सुनारं ला प्रधानयात हानं ज्वनाः कुनेमाः धकाः माग याःगु खः । तर अदालतं उकियात अस्वीकार याःगु दु । थुकिया बारे माःगु छानबिन यानाः २५ न्हु दुने रिपोर्ट बीत आदेश बिउगु दु । सुनारं माग याः थें प्रधानयात कुनेगु आदेश मजुल ।

अथे हे सुनारं तत्कालीन मन्त्री कृष्णगोपाल श्रेष्ठयात नं तुरुन्त पदमुक्त यायेमाः धकाः माग याःगु खः । व नं पूरा मजुल । अदालतं तत्कालीन मन्त्री कृष्णगोपाल श्रेष्ठया बारे लाःगु उजुरी बारे छानबिन यायेत आदेश बिउगु दु । आः वय्कः मन्त्री हे मखयेधुंकूगु कारणं थ्व उजुरीया छुं अर्थ दइ थें मताःगु खँ वय्कलं कनादिल । दकलय् मू खँ सुनारं थःगु मोबाइल बी हे मखु धयाच्वंगु खः, तर व आः वय्कः छानबिनया लागिं थःगु मोबाइल बीत बाध्य जूगु दु । खतुं अदालतं वय्कःया मोबाइलया फोन संवाद जक न्यने दइ, व बाहेक मेगु न्यने दइ मखु धकाः शर्त तःगु दु ।

अधिवक्ता शाक्यया कथं वास्तवय् सुनारया मोबाइल पूवंक हे स्वये खंगु जूसा थ्व सम्पूर्ण प्रकरणय् छु गज्याःगु षडयन्त्र जूगु दु व थुकी सु सु मनूया ल्हाः दु धइगु खँ तकं सी दइगु खः, आः व खँ धाःसा पिहां वयेत थाकुइगु जूगु दु । अथे खःसां सुनारया मोबाइल संवादय् जूगु खँ व वय्कलं थ्व प्रकरणयात कयाः फेसबुकय् न्ववाःगु खँ पानाच्वंगु कारणं थुकी नं वय्कः सफल जुइत थाकुइगु खँ अधिवक्ता शाक्यं कनादिल ।