खुसि सिथय् च्वंगु वडातय् सञ्जाल

येँ (नेपालभाषा टाइम्स)- यँ महानगरपालिकां विष्णुमति खुसि थिउगु येँ मनपाया झिगू वडायात दुथ्याकाः वायु प्रदुषण व्यवस्थापन नागरिक समाज सञ्जाल नीस्वंगु दु । महानगरया वातावरण व्यवस्थापन विभागं म्हिगः वडा नं. १२, २० व २५ पाखें जनप्रतिनिधि व नागरिक समाजया प्रतिनिधि सःताः निरु महर्जनया अध्यक्षताय् झिंछम्ह दुजः दुगु सञ्जाल गठन याःगु खः ।

सञ्जालय् झिगू वडा मध्ये वडा नम्बर १६ पाखें निम्ह व ल्यं दनिगु वडां छम्ह छम्ह प्रतिनिधि दुथ्याकूगु खँ सहायक निर्देशक सानुमैयाँ महर्जनं कनादीगु दु । सञ्जालया उपाध्यक्षय् पपुल सापकोटा व सचिवय् पवनप्रसाद गोर्खाली च्वनादीगु दु ।

उकथं हे दुजलय् गोविन्द श्रेष्ठ, स्वीट थापा, सरिता वज्राचार्य, अनेश चित्रकार, नानीहेरा डंगोल कमल काफ्ले, गौरी देवकोटा च्वनादीगु दु । समितिइ वडा नं. १८ पाखें दुजः थप याये ल्यं दनि । महानगरया कथं सागर प्रजापति, कृपा श्रेष्ठ व विभूति मानन्धर दुथ्याःगु सल्लाहकार समिति नं नीस्वंगु दु ।

महानगरया वातावरण समितिया संयोजक बालकृष्ण महर्जनं समुदायस्तरय् लाथेपाथे फोहोर व प्लाष्टिक च्याकेगु ज्या पनेगु नितिं नागरिक समाजं सहजीकरण याइगु खँ कनादिल ।