किपूमि जनताया ७५ प्रतिशत माग पूवन
येँ – किपू नगरपालिकां एकीकृत सम्पत्ति कर धकाः छेँ व बुँया मूल्यांकन यानाः कयाच्वंगु कर आः बिस्कं बिस्कं हे यानाः काइगु जूगु दु ।
म्हिगः बिहीवाः एकीकृत सम्पत्ति कर विरुद्ध संघर्ष समितिं किपू नपाया मेयर रमेश महर्जनयात एकीकृत सम्पत्ति कर काःगु विरोधय् ज्ञापनपौ बिउगु खःसा उगु ज्ञापनपौ लःल्हानाः कायेगु झ्वलय् मेयर महर्जनं तत्काल एकीकृत सम्पत्ति कर मकासें आः छेँ व बुँया बिस्कं बिस्कं कर कायेगु बचं बियादीगु खँ संघर्ष समितिया कजि नजरराम महर्जनं ‘नेपालभाषा टाइम्स’ यात कनादिल ।
वय्कलं बियादीगु जानकारी कथं आः १ निसें ७ लाख तक मूल्यांकन जूगु छेँया कर ५० तका पूसां गाः । न्हापा ३०० तका कयाच्वंगु कर नं आः म्हो यानाः १५० तका जक कायेगु खँ नं मेयर महर्जनं धयादीगु जानकारी वय्कलं बियादिल ।
न्हापा अप्वः पुलेधुंकूपिनिगु कर छु यायेगु धइगु सवालय् मेयर महर्जनं राज्यया धुकुतिइ दुहां वनेधुंकूगु कर लित मवइगु खँ कनादिसें आः अज्याःगु करयात धरौतीया रुपय् कयाः लिपा नगरपालिकाय् छुं ज्या यायेमाल धाःसा उकिं हे क्वपालाः कायेगु व्यवस्था यायेगु बचं बियादिल ।
यदि अज्याःगु ज्या मजुयाः धरौटी थाति लानाच्वन धाःसा मेगु दँय् कर पुलेबलय् उकी मिलान यायेगु बचं नं मेयर महर्जनं बियादीगु खँ वय्कलं कनादिल ।संघर्ष समितिं मालपोत पुलेत तयार दु, भूमि कर काये दइ मखु, एकीकृत सम्पत्ति कर खारेज या धइगु प्लेकार्ड सहित किपूया धोकासिं न्ह्याःगु ¥याली किपू नपाय् वनाः मेयर महर्जनयात ज्ञापनपौ लःल्हाःगु खः ।
उखे चितवनया रत्ननगर नगरपालिकाय् नं अप्वयेकूगु करया विरोधय् थीथी पार्टीतय्सं म्हिगः धर्ना बिउगु दु । नपां कर अप्वयेकाः जनतायात दुःख बिल धासें अन धर्ना बिउगु खः ।
LEAVE YOUR COMMENTS