र्यापर पुरोहित
यःपिं पासापिं
झी नापलाःगु ई
लुमंकाच्वने झी
न्ह्याबलें न्ह्याबलें
थ्व न्ह्यइपुगु ई
पालभाषा संकिपा ‘तिन तिकः महाविकः’य् दुथ्याःगु छपु म्येँया दथुइ दथुइ नेवाः भासं र्याप हालाः सकसियां नुगः त्याकेत ताःलाःम्ह र्यापर खः– ‘पंक ए जे’ अर्थात पंकज राजोपाध्याय ।
नेपालभाषा संगीत ख्यलय् मुक्कं स्वम्ह र्यापर दु, थुपिं मध्ये छम्ह खः– पंकज ।
पाश्चात्य संगीतय् नं विशेषतः ल्याय्म्हतय् दथुइ लोकंह्वाःगु र्यापया सोंख दुम्ह पंकजया पेशा धाःसा पूर्वेली संस्कृतिया परम्परागत कर्मकाण्ड यायेगु ‘पुरोहित’ ज्या खः ।
आधुनिक संगीतय् नं न्हूगु विधा कथं वयाच्वंगु र्याप हालीम्ह मनू गुकथं पुरोहित ज्याय् थ्यन ले धयागु न्ह्यसलय् पंकजं धाइ, ‘पुरोहित पेशा ला जिमिगु पुख्र्यौली ज्या हे जुल । मचां निसें पुरोहित ज्या स्वयाः, स्यनाः हुर्के जुयाम्ह । अथें जूगुलिं जितः जिगु पुख्र्यौली ज्या हे यल, अले थुकी हे ज्या नं याना ।’
येँया वंघः त्वालय् उद्धव राजोपाध्याय व निवेदिका राजोपाध्यायया क्वखं जन्म जूम्ह पंकजं मचा इलय् थः तःबाः माधव राजोपाध्यायया सहयोगी कथं पुरोहित ज्या सुरु याःगु । पंकजयात थःगु पुर्खाैलि ज्या पुरोहित ज्या याये यः । संगीतख्यः थःगु सौख जूगुलिं पुरोहित ज्यां फुर्सद दुगु इलय् र्याप संगीतपाखे लगे जूगु खः ।
थः थ्व हे क्षेत्रय् लगे जुइ धकाः गबलें नं बिचाः मयाःम्ह पंकज मचायेकं हे थ्व ख्यलय् दुहां वःम्ह खः । ५ कक्षा ब्वनाच्वंबलय् पंकज ध्यान र्याप संगीतय् वन । विदेशी कलाकारपिनिगु र्याप म्येँ न्यनेगु झ्वलय् वयात नं र्याप हालेगु शोंख दयावल । सन् १९९८ या ‘न्यू इयर इभ’य् ठमेल चोकय् जूगु छगू लाइभ कन्र्सटय् वयात ¥याप हालेगु ह्वःताः चूलात । थन नेपालीं र्याप हालाः वं संगीत ख्यलय् पलाः तल ।
मेमेगु म्येँ व र्यापय् छु पाः धइगु न्ह्यसलय् पंकजं धाइ – म्येँ सर्टफर्मय् सिधइसा र्याप डिटेल खः, म्येँया अन्तरा, मुखडा यानाः सिधइसा र्यापय् बार (आखः झ्वः) दइ । र्याप जक हालेगु खःसा म्होति नं १६ बार वा ३२ बार दयेमाः, तर म्येँया दथुइ दथुइ र्याप तइगुलिइ धाःसा ८ बारया जक नं तयेगु याः ।
र्यापरतय्सं थःम्हं हे च्वयातःगु हालीगु खःकि मेपिंसं च्वयातःगु नं हाली धयागु न्ह्यसलय् पंकजया लिसः दु – थःम्हेस्यां च्वःगु खँग्वलय् गुलि फिलिङ्ग वइ, मेपिंसं च्वयातःगुलिइ उलि वइइमखु । च्वमिं छु फिलिङ्गसय् च्वयातःगु धकाः सीके फइमखु । अथे जूगुलिं आपाः थें र्यापरतय्सं थःम्हं हे च्वयाः हाली । र्याप धइगु हे ‘रिडम एण्ड पोइट्रि’ खः । गथे मतिनायात कयाः जुइमाः व देशया बारे हे छाय् मजुइमा, थःगु फिलिङ्गस् छु दु, व हे च्वयेगु, अथे जुल धाःसा फ्लो बांलाइ ।
बांलाःगु छपु र्यापया सृजना यायेत मुक्कं स्वन्हु माः धइम्ह पंकजं राप च्वये न्ह्यः छगू कन्सेप छगू दयेकाः छु विषयलय् राप च्वयेगु खः व कन्सेप ज्वनाः कन्सेपया दुने च्वनाः गुलि कायेफत उलि कायेगु । गथेकि छगू बांलाःगु सफूया महत्व छु खः धकाः व सफुतिं क्यनी अथे हे छगू विषय कयाः व हे विषयात च्वयाः उकिया महत्व क्यनीगु खः । स्वःसा राप धाःगु खँ ल्हाथें जक च्वंसा थुकिया सृजना तसकं थाकू ।
संगीत धयागु हे अन्तर्राष्ट्रिय भाय् धइम्ह पंकजं नेवाः, नेपाली व अंग्रेजी स्वंगुलिं भासं र्याप हालतःगु दुसा आपाः धयाथें नेपाली भासं हालातःगु दु ।
स्वंगुलिं भासं र्याप हालाजूम्ह पंकजयात थःगु मेहनतया पारिश्रमिक छु भासाय् बांलाक वः धइगु न्ह्यसलय् धयादी, ‘मेहनतया फल सोचे याः थें छुकि नं मदु, नेपाली नेवाः छु कि नं मदु । भचा भचा वइ, भचासां वल धयाथें जुइ । न्हापा न्हापा स्ट्रगल पिरेडय् न्यादँ खुदँ तक विना पारिश्रमिक ज्या याना, तर आः धाःसा गबलें नं ल्हाः खालि धाःसा यायेमाःगु मदुनि ।
थ्व ख्यलय् गुलि भविष्य दु ले धइगु न्ह्यसलय् पंकजया लिसः दु, ‘मदुगु ला मखु, भविष्य दु । तर पिने पिने देसय् थें थन अपाय्सकं बांलाः मजू । छाय् धाःसा उलिमछि ब्याण्ड, उलिमछि संगीतय् ज्ञां दुपिं कलाकारपिं थौंकन्हय् क्वथाय् च्वनाः फेसबुय् लाइभ यानाच्वनेमाःगु दु, उपिं खनकी तसकं दुःख ताः ।
थ्व ख्यः बांलाकेत छु यायेमा धइगु न्ह्यसलय् पंकजया लिसः दु – थ्व ख्यःयात बांलाकेगु खःसा कलाकारया प्रतिभा स्वयेमाः । न्ह्याम्हं वइ म्येँ हालि, न्ह्याम्हेसितं दबुलिइ तयाः म्येँ हायेकी अज्याःगु ज्या धाःसा यायेमजिउ । मुख्यतः नातावाद हावी यायेमजिउ । छम्ह बांलाःम्ह कलाकारया कदर यायेमाः ।
थःगु हे जातयाम्ह लिसे इहिपा यायेमाः धइगु बिचाः दुम्ह पंकज आः तक याकःचा जीवन हनाच्वंगु दुसा सायद आः वइगु दँय् बांलाःगु खबर न्यने दइ ला धइगु आशा कयाच्वंगु दु । पंकजया धापू दु– छेँ चले यायेत, कुल न्ह्याकेत इहिपा यायेमाः, उकिं परिवारं मालाच्वंगु दु । साइट जुरे जुल धाःसा सुनां नं पने फइमखु ।
LEAVE YOUR COMMENTS