चर्या प्याखं छगू अनुशासन खः

२०४७ सालपाखे तात्कालीन नेपाल राजकीय प्रज्ञा प्रतिष्ठानय् दँय्दसं जुइगु ‘चुलिंचिया चंचं धेंधेंबल्लाः कासा’ ज्याझ्वः स्वस्वं उकिं हे प्रभावित जुयाः थौं स्वयां २५ दँ न्ह्यः नृत्य ख्यलय् दुहां वःम्ह रिना महर्जन थौंकन्हय् छम्ह नांजाःम्ह व व्यावसायिक नृत्य निर्देशककथं म्हसिउ ।

बालनारायण महर्जन व चिनिकुमारी महर्जनया कोखं येँया ओमबहाः त्वालय् जन्म जूम्ह रिना थौंकन्हय् छत्रपातिइ च्वनादी । २५ दँ न्ह्यवंनिसें थौंतकया दौरानय् थुगु ख्यलय् आपालं हिउपाः वःगु खंकादीम्ह रिनां धयादी – न्हापा जिमिगु पालय् नृत्ययात नकारात्मक रुपं स्वइ धाइनापं कि ‘छु याना च्वनागु, प्याखं हुलायाच्वनागु ला ?’ धकाः ध्याचु नके थें खँ ल्हाइगु जिगु नुगलय् तसकं थुं दिउ ।

आपाःथें मिसामस्तय् मचांनिसेंया रहर धइगु प्याखं हुलेगु हे खः, तर समाजं व इलय् प्याखं हुलेगुयात बांलाःगु मिखां मस्वइगुलिं तसकं थाकु । तर जितः छेँपाखें तःधंगु ग्वाहालि दुगुलिं जितः थ्व ख्यलय् वयेत उलि संघर्ष यायेम्वाःल । अझ ब्याहा जुइ धुंकाः जिम्ह जहान गम्भीरमान सिंहपाखें नं यक्व हे हःपाः, तिबः दुगुलिं नं जितः थ्व ख्यलय् वयेतः अःपुगु खः । वय्कःया लिधंसाया दुगुलिं हे जि थ्व ख्यलय् बांलाक न्ह्याः वने फुगु खः । न्हापा थौंकन्हय् थें फेसबुक, यूट्युब धइगु मदु, आधुनिकता धइगु हे मदु, नेपाली लोकसंस्कृतिया थीथी नृत्य, चर्या नृत्य जक सयेके खन मेमेगु नृत्य स्यने मखं । तर आः धाःसा डान्सया आधार यक्व हे दया वल, आः ला झन आधुनिकता नं दुगुलिं यक्व हे हिउपाः वये धुंकूगु खनेदु ।

कलाकारिता ख्यलय् म्वायेगु आधार दु ला धइगु न्ह्यसलय् रिनाया धारणा थथे दु – न्हापा न्हापा जूसा थुकियायात व्यावसायिक रुपय् मखसे थःगु सौख पूरा यायेकथं जक कायेगु यानाच्वंगु खः। तर जब २०५५ सालपाखे यक्व धइथें स्कुलतय्सं डान्स क्लास छगू नं अनिर्वाय रुपं तयेगु याना हःसांनिसें थुकिं व्यावसायिक रुप कया हःगु खनेदु । थौंकन्हय् ला झन् थीथी रियालिटी शो जुयाच्वंगु दु । युट्युब दु, अथे हे इण्डियन कल्चरयात कयाः इहिपाबलय् डान्स छगू नं दुथ्याकेगु चलन वःगुलिं डान्स स्यनीपिनि सिजनय् तसकं लिमलाः धाःसां छुं मपाः । मेहनत व लगन तयाः थःगु क्षेत्रय् ज्या याना वन धाःसा थुकिं म्वायेगु आधारया लुखा प्रसस्तय् चालाच्वंगु दु ।

येँया बागबाजरय् च्वंगु पद्मकन्या क्याम्पसय् डान्स विषययय् भरत नाट्यम कयाः अध्ययन यानादीम्ह रिनां थौं कन्हय् मस्तय्त ईकथं हिपहप, वेस्टर्न स्टेप, साल्सा, बिब्वइङ, क्लासिकल अले विशेष चचाप्याखं नं स्यनेगु याना वयाच्वंगु दु । मेगु सकतां प्याखं स्यनागु बापत शुल्क कायेगु याना वयाच्वंगु दु, चर्या प्याखं छगुलिइ धाःसा शुल्क मकासे हे स्यना वयाच्वनादीगु दु । हनेबहम्ह गुरु यज्ञमानपति वज्राचार्ययापाखें खुदँ न्ह्यः चर्या नृत्यया दीक्षा कयादीगु इलय् गुरुबाःनं धयादीगु ‘नट फर इन्टरटेनमेन्ट, नट फर अर्निड्ड’ धइगु नुगलय् चिउगु खँग्वलं आतक नं ‘फ्रि अफ कस्त’ स्यना च्वनादीगु खः । थौंकन्हय् गुरुबाः व जिमिगुपाखें यानाः सछिम्हं मल्याक विद्यार्थीपिंत चर्या नृत्य स्यना वयाच्वनागु वय्कलं कनादिल ।

चर्या व मेमेगु नृत्यय् छु पाः धइगु न्ह्यसलय् वय्कलं धयादी – ‘खय्तला चर्या नृत्ययात द्यःपिनिगु प्याखंया रुपय् कायेगु तर थुकियात नेपाःया छगू सम्पदाया रुपय् कायेमाः । चर्या धइगु अनुशासन खः थुगु नृत्य यायेबलय् अनुशासनय् च्वनाः यायेमाः । चर्याप्याखं छगू बौद्ध दर्शनय् आधारित जूगुलिं थुकी अर्थनिसें कयाः हरेक चाल बौद्ध दर्शननाप स्वानाच्वंगु दु । मेमेगु नृत्य संगीतया तालय् याइगु खःसा चर्याप्याखं चचा म्येँया रागया तालय् उकिसनं हरेक शब्दया अर्थय् नृत्य यायेमाः । उकिं थ्व नृत्यया स्टेप याये अःपु तर दर्शन थुइके थाकु धायेमाः ।

नांजाःगु नेपाः डान्स एकेडेमिया संस्थापक रिनां एकेडेमि चायेकेगु नं छगू संयोग हे जूगु खँ न्ह्यथनादिल – थनि १२ निदँ न्ह्यः छन्हु रिनाया छेँय् मिस नेवाःया कोरियोग्राफर केहेँ मय्जु रोहिया महर्जन वःगु जुयाच्वन । थीथी खँ ल्हायेगु झ्वलय् रोहियां झीसं नं छगू डान्स टे«निङ सेन्टर चायेके माल धकाः धाल । रोहियां थथे धाःगु इलय् जि लिक्कं च्वनाच्वंम्ह जि जहानं नं रोहियायात ‘पक्का खः ला ? पक्का खः ला ?’ धकाः न्यन । रोहिया नं खः धयाः भिनाजु धायेखतं निम्हं खुरुरु पिहां वन । इपिं निम्हेसिनं धल्कोय् रोहियां न्हापा हे स्वयातःगु थासय् वनाः न्याद्वः दां बैना बिया थाय् पक्का याना वयेवं नेपाः डान्स एकेडेमि संस्थाया उदय जूगु जुल, गुगुकि छगू संयोग हे धायेमाली । संस्था ला चायेका तर चले यायेगु चुनौति यथावत तिनि । थ्व हे दौरानय् न्हापांम्ह विद्यार्थीकथं न्यू जेनिथ मोडेल स्कुलया अनिना महर्जनपाखें दर्ता यानाः मुक्कं ९–१० म्ह विद्यार्थीपाखें शुरु यानागु संस्थाय् थौ सुथय् बहनी निगू शेसनय् यानाः २०० म्ह विद्यार्थीपिंत डान्स स्यनेगु यानाच्वंगु दु ।

टर्किइ जूगु ‘इन्टरनेशनल चिलडे«न फेस्टिबल’ ज्याझ्वलय् लगातार निदँ तक सहभागि । कम्बोडिया जूगु ‘एशियन प्यासेफिक समीट–२०२०’ व इण्डिया जूगु साँस्कृति ज्याझ्वलय् नेपाःया प्रतिनिधि कथं ब्वति कयाः नेपाःया म्हसीका बियादी धुंकूम्ह रिना न्हापा ताम्सिपाखा देक्वयच्वंगु न्यू जेनिथ मोडेल स्कुलय् आखः ब्वंकेगु व डान्स नं स्यनेगु गु खःसा थौंकन्हय् न्यू जेनिथ स्कुलनापं मेगु गुंगू स्कूलय् डान्स स्यनेगु ज्या न्ह्याकाच्वनादीगु दु ।

११ दँ न्ह्यः थःपिंसं हे स्थापना याःगु एकेडेमिया ग्वसालय् सगरमाथा टेलिभिजनय् ‘मेघा डान्स कम्पिटिशन’ व दछि लिपा ‘किड्स मेगा डान्स कम्पिटिशन’ नांया रियालिटी शो यानागु अनुभव दुम्ह रिनां आः याकनं हे नेपाः हे आतकया दकलय् तःधंगु धन राशि दुगु मस्तय्गु डान्स रियालिटी शो ‘डान्स मास्टर लिटिल च्याम्प’ यायेत्यंगु दु । थौंकन्हय् कमेडी च्याम्पियन संचालन याना वयाच्वंगु संस्था ‘थ्री प्रोडक्शन’ व ‘नेपाः डान्स एकेडेमि’नाप जानाः उगु रियालिटी शो यायेत्यंगु खःसा वइगु असोज २ गते निसें डिजिटल अडिशन कायेगु ज्या न्हयायेत्यंगु दु ।

नृत्यपाखें हे यक्व नां कमे यायेगु व सम्मान नं कयादीधुंकूम्ह रिनां थ्व ख्यलय् न्हू पलाः तयादीपिंतं थुकथंया सुझाव बियादी – सकसिकें थःथःगु म्हगस दयाच्वनी, सकसियां छगू हे म्हगस जुइ मखु । सःसा मसःसां डान्स यायेगु नं सकसितं इच्छा दयाच्वनी । यदि थ्व ख्यलय् दुहां वयाः थःगु करिअर दयेकेगु खःसा दकलय् न्हापां थुकिया शिक्षा कायेमाः । उकिया निंतिं एसइइ सिधयेवं श्रृजना कलेज अफ फाइन आर्ट व ब्याचलरया निंतिं पद्मकन्या क्याम्पसय् उच्च शिक्षा कायेगु दु । शिक्षाया बःकयाः थौंकन्हय् थःत छु डान्स यःगु खः व हे विषयय् बांलाक तालिम कयाः थ्व ख्यलय् दुहां वल धाःसा थःगु जीवनया छगू बांलाःगु लुखां छितः पियाच्वंगु दु व उगु लुखां दुहां वनेगु मौका छिं तंके मजिउ ।