लिपा छुं फल दइ जुइ – भिमसेन रिसाल
पेशां छम्ह निपूर्णम्ह तिसाया कालिगढ खःसां मचांनिसें अभिनय यायेगु इच्छा व नांजाःम्ह कलाकार सन्तोष पन्तपाखें प्रेरित जुयाः कलाकारिता ख्यलय् वःम्ह कलाकार खः– भिमसेन रिसाल ।
२०४६ पाखे खस नेपाली भाय्या दबू प्याखं ‘इज्जत’य् अभिनय् यानाः कलाकारिता ख्यलय् दुहां वःम्ह रिसाल भाजु थः छम्ह गैर नेवाः जूसां नेपालभाषा ख्यलय् सकसियां नुगः त्याकाच्वंम्ह कलाकार खः ।महाकवि गिरिजाप्रसाद जोशीया ‘हाकु स्वाहाने’ ख्यालःपाखें नेपालभाषा ख्यलय् पलाः न्ह्याकादीम्ह वय्कःया पलाः थौं तक मदिक्क न्ह्यानाच्वंगु दु ।
आपालं खस नेपाली भाषाया फिल्म, टेलिफिल्मया लिसें नेपालभाषा दबू प्याखं, ख्यालः, संकिपा, टेलिसिरियलय् म्हिते धुंकूम्ह रिसालयात गैर नेवाः जुयाः नं नेवाः भाय् ल्हानाः अभिनय यायेगु गुलित थाकु धकाः न्यनागु न्ह्यसलय् वय्कलं धयादी– ‘अभिनय यायेगु धयागु अःपुगु ज्या मखु । तर छम्ह कलाकारं न्ह्यागु कथंया नं अभिनय यायेमाः । छम्ह कलाकार बाखनं छु फ्वनाच्वन धयागु थुइकाः दुनेथ्यंक दुहां वनाः अभिनय ययेफत धाःसा तिनि व पूर्ण जुइ । मेगु खँ, नेवाः भाय् ल्हानाः अभिनय यायेत थाकुमजूगु कारण धयागु जि मचां निसें नेवाः भाय् ल्हाना वयाच्वनाम्ह जूगुलिं नं खः । जि बूगु हे येँया कुसुमबियालाछिइ खः । नेवाः भाय् जिं जक मखु जिमि मां, अबु, दाजु, ततापिंसं नं बांलाक ल्हाये सः । उकिं जित नेवाः भाय् ल्हानाः अभिनय यायेत थाकू मजू ।’
जिमि जहान नेवाः खः, महर्जन जातयाम्ह । जि नाप इहिपा जूगुलिं जिमिगु रिति कथं जहानया न्हाय् प्वाः खनेमाल । जिपिं गनं नेवाःतय्थाय् भ्वय् वनेबलय् जितः नेवाः धाइगु, जिमि जहानयात धाःसा गैर नेवाः धकाः तायेकाः खँ ल्हाइपिं आपाः हे दु ।’
भिमं नेवाः भाय् ल्हाःगु खनाः नांजाःम्ह कलाकार ख्यालि जुजु मदनकृष्ण श्रेष्ठं नं तारिफ यानादीगु दु । मदनकृष्णं धयादी, ‘छम्ह गैरनेवाः जुयाः नं जिमिसं स्वयां बांलाक नेवाः भाय् ल्हाइम्ह खः भिमसेन । थ्व ला ‘नेपालभाषाय् पिएचडि यानातःम्ह’ खः ।’ ख्यालि जुजु मदनकृष्णया थज्याःगु तारिफ न्यनेखंम्ह भिमसेनं नेपालभाषा ख्यलय् वयाः तसकं गर्व ताःगु खँ कनादी ।
कलाकारिता ख्यलय् स्वंगू दशक लगे जुयादीधुंकूम्ह वय्कलं थ्व दौरानय् आपालं हिउपाः वःसां थुगु ख्यलय् न्हापा थें बांलाःगु बाखं व अभिनय आः माले थाकूगु खँ धयादी । ‘थौंकन्हय् म्यूजिक भिडियो व संकिपाया ल्याः ला अप्वल तर कथावस्तु, अभिनय उलि न्ह्यथनेबहःगु मदु । क्वान्टिटी दु, क्वालिटि मंत’, वय्कलं थःत ताःगु खँ थुकथं धयादी ।
नेपाली ख्यलय् स्वयां नेपालभाषाया ख्यलय् मिजं कलाकार छाय् यक्व म्हो खनेदुगु धयागु न्ह्यसलय् भिम रिसालया लिसः दु– ‘नेपालभाषा ख्यलय् मिजंपिं जक मखु मिसापिं कलाकार नं यक्व मदु । धाथें धायेमाल धाःसा थन छम्ह निम्ह हिरो हिरोइन बाहेक मेपिं हिरो हिरोइन मालेमाःसा गन वना माः वनेगु ?’ कलाकार मदुगु मखु तर व दक्वं मेमेगु रोलया निंतिं कलाकार दु । मेन रोल यायेमाःसा कलाकार हे मदु धाःसां जिउ ।’
थथे जूगु हुनिं छु खः धकाः न्यनागु न्ह्यसलय् वय्कलं धयादी– ‘मू खँ ला ध्यबा हे खः । थन कलाकारया मू मदु । वयागु श्रमया पारिश्रमिक मदु । छम्ह कलाकारं कलाकारीता यानाः म्वाये फइगु आधार हे मदु अले गनं कलाकारत पिहां वइ ? बांलाःगु पारिश्रमिक ब्यूसां कलाकार नं जन्मे जुइ । यक्व धयाथें कलाकारत बिना पारिश्रमिक भाय्या निंतिं धकाः जक सनाजूगु दु ।’
थथे जूगु दोष सुयागु खः ले ? धयागु न्ह्यसलय् भिमसेनया लिसः दु– ‘जिं ला थुकी अप्वः दोष निर्देशकपिनिगु हे खना । अप्वः थें निर्मातापिंसं कलाकारपिंत धकाः बजेट छुटे यानातःगु दइ । अले निर्माताथाय् वनाः स्वः वंसां कलाकारतय्गु ध्यबा यंका तयेधुंकूगु खनेदइ, तर कलाकारतय्गु ल्हातय् धाःसा लाइ मखु । जितः जिगु श्रमया पारिश्रमिक ब्यूपिं निर्देशक ल्हातय् ल्याखायेफु । बिउपिं मदुगु मखु तर बिउपिनि तुलनाय् मबिइपिं आपाः दु । मेगु ला छु खँ ल्हाये अपाय्धंगु टिभी च्यानल चले यानाच्वंगु संस्था ‘इमेज च्यानलं’ तकं कलाकारतय्गु श्रमया महŒव मथू । मेगु ला छु धाये १५० भागनिसें थौं तक ख्वताबजिइ अभिनय याना वयाच्वनागु तर बिना पारिश्रमिक हे याना वयाच्वना तिनि । भलसा दु लिपा लिपा पारिश्रमिया व्यवस्था जुइ ।’
खस नेपाली भाय् फिल्मय् नं म्हिता वयाच्वंम्ह भिमसेनजुया अनुभव खसनेपालीपाखे बांलाःगु हे दु । ‘झीगु ख्यः व अनया ख्यः यक्व हे पाः । अन व्यावसायिकता दु । छगू फिल्म म्हितेबलय् ग्वन्हु सुटिङ यायेमाःगु खः वन्हुया सम्झौता पत्र हे दयेकाः फिल्म म्हितकी । न्हापा हे छन्हुया गुलि पारिश्रमिक कायेगु खः धाः धाइ, अले जिपिं सल्लाह यानाः गुलि बी फइ उलि बी धाइ । अले फिल्म सुटिङ लिसें दबिंग दक्वं क्वचाये धुंकाः पारिश्रमिक धकाः ला मखु लँ खर्च धकाः छन्हुया प्यद्वः न्याद्वःया ल्याखं खामबन्दी यानाः ध्यबा बिया हइ ।’
छम्ह गैरनेवाः जुयाः नं नेपालभाषा संकिपा ख्यलय् दुग्यंगु योगदान याना वयाच्वनादीम्ह भिमसेनयात थःगु योगदानयात आःतक सुनां नं सम्मान याःगु थें मताः । वय्कलं धयादी– ‘आःतक अज्याःगु सम्मान चूलाःगु मदुनि, गुकिया हकदार खः । तर ‘मतिनाया चिं’ धाःसा यक्वस्यां बिउगु दु । आः मखुसां थ्व ख्यलय् यानागु योगदान बापत लिपा छुं फल दइ जुइ ।’
वय्कलं अभिनय यानादीगु ‘घोषक’ नांगु नेपालभाषाया फिल्म याकनं हे पिदनेत्यंगु दु । विशेषतः अभिनय ख्यलय् सक्रियम्ह भिमसेनं मछिन्द्र क्लबपाखें ग्वसाःग्वःगु चिहाकः संकिपा धेंधेंबल्लाः कासाया इलय् थःम्हं हे च्वयाः, थःम्हं हे निर्देशन यानाः छगू चिहा संकिपा नं दयेकादीगु दु । अथेहे छगू म्यूजिक भिडियो नं वय्कलं निर्देशन यानादीगु दु ।
LEAVE YOUR COMMENTS