नेकपाय् केन्द्रीय बैठक माग

येँ (नेपालभाषा टाइम्स) – सत्तारुढ दल नेपाल कम्युनिष्ट पार्टी दुनेया विवाद तच्वया वनेवं आः अनया केन्द्रीय दुजःतय्सं केन्द्रीय कमिटीया बैठक च्वनेमाःगु माग यासें पार्टी कार्यालय लिखित पौ दर्ता याःगु दु। म्हिगः १५२ म्ह केन्द्रीय दुजःतय्सं उकथं लिखित पौ दर्ता याःगु खः । लछि न्ह्यवंनिसें न्ह्यानाच्वंगु स्थायी कमिटीया बैठकं पार्टीया विवाद समाधान याइगु गुगुं नं कथंया निष्कर्ष पिकाये मफुगुलिं आः केन्द्रीय बैठक हे च्वनाः थुकिया निकास पिकायेमाः धइगु माग यासें केन्द्रीय समितिया दुजःतय्सं उगु पौ दर्ता याःगु खः ।

पार्टी दुने ब्वलंगु विवादं थःपिं चिन्तित याःगु दु धासें निम्ह अध्यक्षपिंत सम्बोधन यानाः दर्ता याःगु उगु पतिइ धयातःगु दु, ‘आः खने दुगु विवाद व समस्याया समाधानयात पार्टीया बैठकय् हे गहन सहलह व विधि पद्धति कथं समस्या ज्यंकेमाः धइगु जिमिगु क्वःछिना खः, थुकिया निंतिं पार्टीया अन्तरिम विधान, २०७५ या धारा ५९ (क) ४ बमोजिम केन्द्रीय समितिया बैठक सःतेमाः धइगु जिमिगु माग खः ।’

पार्टीया विधान कथं प्यब्वय् छब्व केन्द्रीय समितिया दुजःतय्सं बैठक माग यात धाःसा झिंन्यान्हुया दुने बैठक सःतेमाःगु प्रावधान दु। पार्टी ज्याकुथी दर्ता याःगु पतिइ १५० म्ह केन्द्रीय दुजःतय्सं हस्ताक्षर यानातःगु दु। पार्टीया केन्द्रीय कमिटीइ प्रधानमन्त्री केपी ओलीया बहुमत मदुगु खँ धाःगु दु ।