चुनाव घाराघुरु यायेगु घोषणा

येँ (नेपालभाषा टाइम्स)-नेक्र विक्रम चन्द ‘विप्लव’ नेतृत्वया नेपाल कम्युनिष्ट पार्टीं थ्वहे मंसिर ४ गते जुइगु प्रतिनिधिसभा व प्रदेशसभाया चुनाव घाराघुरु यायेगु निर्णय याःगु दु । गुक्वःगु महाधिवेशनं निर्वाचन जूगु केन्द्रीय समितिया वंगु कार्तिक ४ गते च्वंगु बैठकं चुनाव खारेज यायेगु निर्णय याःगु खँ स्थायी कमिटीया दुजः सन्तोष बुढामगरं कनादीगु दु ।

चुनाव खारेज अभियान अन्तर्गत देय्न्यंकं भण्डाफोर व प्रचार अभियान न्ह्याकेगु निर्णय जूगु खँ नं म्हिगः प्रज्ञा प्रतिष्ठानय् ग्वसाः ग्वःगु पत्रकार सम्मेलनय् वय्कलं कनादिल ।

उकथं हे नेकपाया प्रवक्ता खड्ग बहादुर विश्वकर्मा ‘प्रकाण्डं’ दकलय् अप्वः भ्रष्ट जूगु पार्टीं हे भ्रष्टाचारया छानविन यायेगु धकाः याःगु घोषणा मल्वःगु खँ धयादीगु दु । राष्ट्रिय प्रजातन्त्र पार्टीं थःगु घोषणा पौ सार्वजनिक यायेगु झ्वलय् २०४७ साल लिपा पदय् वःपिं प्रधानमन्त्री, मन्त्री, संवैधानिक निकायया प्रमुख व विशिष्ट श्रेणीया कर्मचारीया सम्पत्ति छानविन यायेत शक्तिशाली आयोग दयेकेगु घोषणा याःगु खः ।

पत्रकार सम्मेलनय् प्रवक्ता विश्वकर्मां धयादिल, ‘संसदवादी पार्टीतय्सं चुनावय् वनेत घोषणा पौ भटाभट सार्वजनिक याःगु दु । म्हिगः छुं पार्टीं घोषणा पौ जारी यात । थ्व देशय् गुम्हेस्यां अप्वः भ्रष्टाचार यानाः ध्यबा मुंकातःगु दु, उमिगु सम्पत्ति छानविन यायेगु धाःगु दु, जिं छु धाये धाःसा सु अप्वः भ्रष्ट दु, वं हे सम्पत्ति छानविन यायेगु खँ ल्हाइ, जनतायात मूर्ख दयेकेत थज्याःगु खँ धयाच्वंगु दु ।’