बन्दरगाहया विरोध याःपिं ज्वन

येँ – स्थानीय जनताया विरोधया दथुइ म्हिगः प्रधानमन्त्री केपी ओलीं चोभारय् सुख्खा बन्दरगाहया शिलान्यास यानादिल । प्रधानमन्त्री ओलीं शिलान्यास याइगु जुइवं स्थानीय जनतां सुथंनिसें हे समारोहस्थलय् नाराबाजी यानाः धर्ना बिउगु खःसा प्रहरीं विरोध यानाच्वंपिं स्थानीय जनतायात ज्वना यंकूगु खः ।

विरोधया झ्वलय् स्थानीय वासिन्दां ‘सुख्खा बन्दरगाह चाहिँदैन, सम्पदा मास्न पाइँदैन, चोभारको पहिचान बचायौं, सुख्खा बन्दरगाह भगाऔं’ च्वयातःगु ब्यानर नं प्रदर्शन याःगु खः । प्रहरीं चोभार संरक्षण समितिया संयोजक पञ्चलाल महर्जन लिसें ५४ म्हेसित ज्वना यंकूगु खः । प्रदर्शन चोभार संरक्षण समितिया नायः पञ्चलाल महर्जनया नेतृत्वय् जूगु खः ।

ज्वना यंकूपिं मध्ये २६ म्हेसित महेन्द्र पुलिस क्लबय् तःगु खःसा २८ म्हेसित कालिमाटी प्रहरीइ तःगु खः । ज्वनायंकूपिंत म्हिगः बहनी हे त्वःता हःगु दु । प्रहरीं सत्यनारायण कर्माचार्य, अम्कन कर्माचार्य, रविन्द्र महर्जन, गोविन्द थापा, पत्रकार कपिल काफ्ले लिसें यक्वसित ज्वनायंकूगु खः ।

न्हापा छक्वः नं कुतः जूसां विरोधया कारणं स्थगित जूगु शिलान्यास म्हिगः प्रधानमन्त्री ओलीं याइगु ज्याझ्वः दयेकातःगु खः । शिलान्यासया विरोध यायेवं अन द्वःछि स्वयां अप्वः प्रहरी परिचालन याःगु खः । स्थानीय वासिन्द सुजिन्द्र महर्जनं नेपालभाषा टाइम्सयात कनादी कथं कथं अन प्रशस्त प्रहरी छ्यलाः शिलान्यास याःगु दु ।

शिलान्यास ज्याझ्वलय् स्थानीय जनता छम्ह हे मदुसा किपूया स्थानीय जनप्रतिनिधि लगायत सांसदतय्सं तकं ज्याझ्वः बहिष्कार याःगु खः । स्थानीय वासिन्दां चोभाः लागा पर्यटकीय महत्व दुगु थाय् जूगुलिं अन सुख्खा बन्दरगाह तये मजिउ धकाः ताःई न्ह्यवंनिसें विरोध याना वयाच्वंगु खः । उकी स्थानीय जनप्रतिनिधि लिसें सांसदतय्गु नं समर्थन दुगु खः ।

संयोजक महर्जनं नेपालभाषा टाइम्स लिसे खँ ल्हासें वर्तमान सरकारं पञ्चायतकालीन रवैया क्यंगु द्वपं बियादिल । वय्कलं थःपिनि आन्दोलन जारी दु याकनं हे मेगु विरोध कार्यक्रम हयेगु तयारी जुयाच्वंगु खँ नं कनादीगु दु । चोभाः लागा ऐतिहासिक महत्व दुगु थाय् जूगुलिं बन्दरगाह दयकेबलय् पुरातात्विक सम्पदाय् लिच्वः लायेफइ धासें विरोध जुयाच्वंगु खः ।

अथेहे वातावरणविद्तय्सं नं चोभारय् सुख्खा बन्दरगाह दयेके मजिउ धकाः सुझाव बियाच्वंगु दु । उगु लागां स्वनिगलय् स्वच्छ फय् दुहां वइगु लँपु जूगुलिं सुख्खा बन्दरगाह दयेकल धाःसा स्वनिगःया वातावरण स्यनी धासें वातावरणविद्तय्सं विरोध याना वयाच्वंगु खः ।

थ्वहे झ्वलय् स्थानीय वासिन्दातय्सं सुख्खा बन्दरगाह दयेके मजिउगु खँयात कयाः थीथी निकायय् ज्ञापनपौ बीधुंकूगु दुसा बन्दरगाहया मू लगानीकर्ता विश्व बैंकं नं स्थानीय जनताया विरोध दुगु कारणं थुकी लगानी यायेगुपाखें थःपिं लिचिलेगु खँ धाःगु दु ।

सरकारं चोभारय् सुख्खा बन्दरगाह दयेकेधुंकाः अन भारतं वइगु रेल व चीनया केरुङ जुयाः वइगु रेल, भारतं मालवाहक सामान ज्वना वइगु कन्टेनर व चीनं वइगु कन्टेनर नं अन हे अनलोड यायेगु सरकारया ग्वसाः खः ।

 

सम्बन्धित बुखँ

LEAVE YOUR COMMENTS