ने. सं. ११४६ बछलागा अष्टमी -

प्रधानमन्त्रीयाके श्री ३ ति अधिकार दु ला ?

येँ – संसद विघटन सम्बन्धी मुद्दाय् जूगु जवाफी बहसय् म्हिगः कानुन व्यवसायीतय्सं प्रधानमन्त्रीयात श्री ३ व श्री ५ सरह हे अधिकार बियातःगु दु धकाः गन च्वयातःगु दु धकाः न्ह्यसः न्यंगु दु । छुं न्हि न्ह्यः प्रधानमन्त्रीया पक्षं बहस यानादीम्ह अधिवक्ता रामचन्द्र गौतमं आःयाम्ह प्रधानमन्त्रीयाके श्री ३ व जुजुया बराबर हे अधिकार दु धकाः दावी यानादीगु खः । म्हिगः जवाफी बहस यासें अधिवक्ता कञ्चनकृष्ण न्यौपानें प्रधानमन्त्रीयात अज्याःगु अधिकार दु धकाः गुगु धाराय् च्वयातःगु दु धकाः न्ह्यसः न्यंगु खः ।

प्रधानमन्त्रीया कानुन व्यवसायी–तय्सं प्रधानमन्त्रीं संविधानया अविशिष्ट अधिकार छ्यःगु खः धकाः याःगु जिकिरयात कयाः टिप्पणी यासें वय्कलं धयादिल, ‘अवशिष्ट अधिकार धइगु प्रधानमन्त्रीं न्ह्याथें याःसां जिउ धइगु कथंया मखु । प्रधानमन्त्री गथे यात उकियात माने याना वनेगु खःसा इजलास हे मदुसां नं जिउगु जुल ।’