ने. सं. ११४३ ञलाथ्व चतुर्दशी -

ओलीया निर्णय प्रति नेपाल असन्तुष्ट

येँ – प्रधानमन्त्री लिसें एमालेया अध्यक्ष केपी शर्मा ओलीं पार्टीया झिक्वःगु महाधिवेशन आयोजक कमिटी भंग यानादीगु दु । आयोजक कमिटीया म्हिगः च्वंगु बैठकं पार्टीया महाधिवेशन आयोजक कमिटी भंग यायेगु निर्णय याःगु खः ।

पार्टीया प्रवक्ता प्रदिप ज्ञवालीं म्हिगः पत्रकारतलिसे खँ ल्हासें उगु खँ धयादीगु खः । लिसें म्हिगः च्वंगु महाधिवेशन कमिटीया बैठक लिपांगु जूगु खँ नं धाःगु दु ।
आः एमालेया ज्याझ्वः फुक्कं केन्द्रीय कमिटीया नामं हे न्ह्याकेगु खँ नं धाःगु दु । अथे हे एमालेया पदाधिकारीपिं नं सकलें यथावत जुइगु खँ धाःगु दु । उकथं हे म्हिगःया बैठकं नेकपा दयेकेगु झ्वलय् एमालेपाखें व माओवादीपाखें एमालेय् च्वनाच्वंपिं स्थायी कमिटीया दुजःतय्त नं एमालेया स्थायी कमिटीया दुजः दयेकेगु निर्णय याःगु दु । उकथं हे थ्व निर्णय लिपा आः पार्टीं वरिष्ठ नेता माधव नेपाल लगायत झिंछम्ह नेतातय्त यानातःगु कारबाही निष्प्रभावी जुइगु खँ नं धाःगु दु ।

मेखे प्रधानमन्त्री ओली पुचलं याःगु थ्व निर्णययात कयाः नेपाल पुचलं धाःसा आपत्ति प्वंकूगु दु । पुलांपिं माओवादी नेतातय्त समेत कमिटी तयाः निर्णय याःगुलिं माधव पुचलं उकी आपत्ति प्वंकूगु खः । नेपाल पुचलं थःपिनिगु माग पार्टी कमिटीयात जेठ २ गते न्ह्यःया अवस्थाय् यंकेमाः धायेगु याना वयाच्वंगु खः । थ्व निर्णय लिपा उगु खँ अझं स्पष्ट मजूगु खँ धाःगु दु ।

थुगु निर्णय यायेधुंकाःलि थ्वहे असार १८ गते च्वनेगु धकाः क्वःछिउगु एमालेया बैठकय् नेपाल पुचलं ब्वति मकायेगु खँ धाःगु दु ।