कीर्तिपुर ः द लिजेन्ड अफ कीर्तिलक्ष्मी देय्न्यंकंया सिनेमा हलय्

येँ – ‘कीर्तिपुर ः द लिजेन्ड अफ कीर्तिलक्ष्मी संकिपा वइगु असार १३ गतेनिसें देय्न्यंकंया सिनेमा हलय् क्यनीगु जूगु दु । मदुम्ह वासुपासाया कृति ‘भैरवसिंह’ नांया ऐतिहासिक उपन्यासया लिधंसाय् उगु संकिपा दयेकूगु खः । झिंच्यागूगु शताब्दीइ गोर्खाया तत्कालीन जुजु पृथ्वीनारायण शाहं किपुलिइ आक्रमण याःगु घटनायात कयाः उगु संकिपा निर्माण यानातःगु खः ।

फोकस पिक्चर्सया ब्यानरय् निर्माण जूगु संकिपाय् हिसिला महर्जन, मणि राजलवट, यशराज गराच, सुशील राजोपाध्याय, लक्ष्मी गिरी, मदनदास श्रेष्ठ, सुरवीर पंडित, अंजला नकःमि, मञ्जु श्रेष्ठ, विनोद श्रेष्ठ लगायतया कलाकारपिनिगु मुख्य भूमिका दु । ९० प्रतिशत स्वयां अप्वः एनिमेशनलिसें भीएफएक्सया प्रयोग यानातःगु संकिपाया निर्देशन प्रदीप खड्गीं यानादीगु खःसा कार्यकारी निर्माता विरेन्द्र ताम्रकार व निर्माता प्रेम खड्गी व अनन्त श्रेष्ठ खः ।

संकिपाया पटकथा खड्गी व केके मानन्धरया खःसा हरिशरण साय्मिया संगीत दुथ्यानाच्वंगु संकिपाया छायांकन शंकर महर्जन व नवीन जोशीं यानादीगु खः । ताःई तक सेन्सरया समस्या फयाच्वंगु थुगु संकिपायात संचार मन्त्रालय अन्तर्गतया केन्द्रीय चलचित्र जांच समितिं प्रदर्शनया निंतिं ‘युनिभर्सल अनुमति पत्र’ बिउगु संकिपाया कला निर्देशकतकं जुयाच्वनादीम्ह मानन्धरं जानकारी बियादीगु दु ।

सेन्सर पास जुयाः प्रदर्शनया निंतिं तयारी जुयाच्वंगु थुगु संकिपा सेन्सर पास याकेत हे निक्वःतक सम्वद्ध निकायया पदाधिकारीयात क्यनेमाःगु निर्माण पक्षं जानकारी बिउगु दु ।

सम्बन्धित बुखँ

LEAVE YOUR COMMENTS