अक्सिजन व स्वास्थ्य सामग्री ग्वाहालि
येँ – वल्र्ड भिजन इन्टरनेशनल नेपालया ग्वाहालिइ बाल विकास समाज व असल छिमेकी नेपालं येँ महानगरपालिका वडा नं. १६ वडा व किपू नगरपालिकायात अक्सिजन सिलिन्डरलिसें मेमेगु स्वास्थ्य सामग्री लःल्हाःगु दु ।
वल्र्ड भिजनया ग्वाहालिइ बाल विकास समाज व असल छिमेकी निगू संस्थापाखृें मंकाःकथं येँ महानगरपालिकाया १६ वडाअध्यक्ष मुकन्द रिजालयात १५ गः अक्सिजन सिलिन्डरलिसें आवश्यक मेमेगु स्वास्थ्य सामग्री लःल्हाःगु खः ।
वल्र्ड भिजनया कार्यक्रमण संयोजक सुरेन्द्ररत्न शाक्य, विनय चौहान व गरिमा चौलागाइँलिसें बाल विकासया कार्यक्रम व्यवस्थापक प्रदीप श्रेष्ठं मंकाःकथं अक्सिजन सिलिन्डर व स्वास्थ्य सामग्री येँ मनपा १६ वडाअध्यक्ष रिजालयात लःल्हानादीगु खः ।
स्वास्थ्य सामग्री लःल्हाना कयादिसें वडाअध्यक्ष रिजालं थज्याःगु विषम परिस्थितिइ आवश्यक स्वास्थ्य सामग्री ग्वाहालि याःगुलिं वल्र्ड भिजन, बाल विकास समाज व असल छिमेकीप्रति आभार प्वंकादिसें प्राप्त स्वास्थ्य सामग्री जनमैत्री अस्पतालयात लःल्हायेगु जानकारी बियादिल ।
थुकथं हे उगु संस्थापाखें किपू नगरपालिकायात नं अक्सिजन सिलिन्डरलिसें स्वास्थ्य सामग्री ग्वाहालि याःगु दु । किपू नगरपालिकाया प्रमुख रमेश महर्जन व उपप्रमुख सरस्वति खड्काया उपस्थितिइ २५ गः अक्सिजन सिलिन्डर व आवश्यक मेमेगु स्वास्थ्य सामग्री लःल्हाःगु खः ।
वल्र्ड भिजन, बाल विकास समाज व असल छिमेकीया प्रतिनिधिपिंसं नगरपालिकायात उगु सामग्री लःल्हाःगु खः । उगु इलय् किपू नगरपालिकाया प्रमुख महर्जन व उपप्रमुख खड्कां ग्वाहालिया निंतिं सहयोगी संस्थाप्रति आभार प्वंकादीगु खः ।
LEAVE YOUR COMMENTS