चीधंगु वामतय् मंकाः मोर्चा

येँ – नेकपा (क्रान्तिकारी माओवादी) या महासचिव मोहन वैद्य किरणं प्रतिनिधिसभा विघटनं संसदीय व्यवस्थाया असफल जुल धकाः पुष्टि जूगु खँ धयादीगु दु । म्हिगः प्यंगू कम्युनिष्ट पार्टीया रणनैतिक मोर्चाया घोषणा ज्याझ्वलय् न्ववासें महासचिव बैद्यं उगु खँ धयादीगु खः ।
सरकारं समाजवाद व समृद्धिया खँ ल्हानाच्वंसां नं साम्राज्यवादी नवउदार–वादया सिलः फायाच्वंगुलिं नेपाःया संसदीय व्यवस्था असफल जूगु व उकिया लबः कयाः वैदेशिक प्रतिक्रियावादीत न्ह्यःने वयाच्वंगु द्वपं नं बियादीगु दु ।

म्हिगः वैद्यया नेतृत्वया नेकपा (क्रान्तिकारी माओवादी) विप्लव नेतृत्वया नेकपा, ऋषिराम कट्टेल नेतृत्वया नेपाल कम्युनिष्ट पार्टी व आहुति नेतृत्वया वैज्ञानिक समाजवादी कम्युनिष्ट पार्टी नेपालं रणनीतिक मंकाः मोर्चा घोषणा याःगु खः । मोर्चां वर्तमान प्रतिक्रियावादी राज्यसत्ताया अन्त्य, संसदीय व्यवस्थाया अन्त्य यानाः जनगणतन्त्र व वैज्ञानिक समाजवाद स्थापना यायेगु आज्जु तयातःगु खँ महासचिव वैद्यं धयादीगु दु ।

मोर्चां क्रान्तिकारी कम्युनिष्टतय्त गोलबन्द यानाः पार्टी एकता यासें राष्ट्रियता, राष्ट्रिय स्वाधिनताया रक्षा व जनजीविकाया समस्या ज्यंकेगु निंतिं निरन्तर संघर्ष यायेगु घोषणा नं याःगु दु । रणनैतिक मंकाः मोर्चांं न्हापांगु चरणया आन्दोलन नं घोषणा याःगु दु । घोषणा याःगु ज्याझ्वः कथं थौं येँय् घोषणासभा याइगु जूगु दु । उकथं हे फागुन ६ गते बुटवल, १४ गते धनगढी व १८ गते इटहरीइ जनसभा याइगु जूगु दु ।

नेपालभाषा टाइम्स

च्वमिया मेमेगु

• जुगि जातया आवासया समस्या
• मेलम्चीया लः वइगु अझं अनिश्चित
• बँ पसः तयेके हे मबीगु बालेनया अडान
• फणीन्द्रयात सिद्धिदास सिरपाः
• इहिपा ज्याझ्वलय् मिं नयाः सछिम्ह मल्याकं सित