तोखा नपापाखें ब्वनेकुथि, विद्यार्थी व शिक्षकयात सम्मान
येँ(नेपालभाषा टाइम्स)- तोखा नगरपालिकां नगर दुनेया उत्कृष्ट ब्वनेकुथि, विद्यार्थी व शिक्षकयात सम्मान याःगु दु । नगरपालिकां ५८ क्वःगु राष्ट्रिय बाल दिवसया लसताय् उगु सम्मान याःगु खः ।
ज्याझ्वय् नीम्ह विद्यार्थी, ४१ म्ह शिक्षक व १२ गू ब्वनेकुथियात नगर व दसिपौलिसें सम्मान याःगु खः । नगरपालिकां तगिं १० व १२ य् उत्कृष्ट लिच्वः हयेत ताःलाःपिं विद्यार्थी नापं शिक्षक व ब्वनेकुथियात सम्मान याःगु खः । सम्मानित विद्यार्थीयात म्हतिं १२,५००÷– तका दां व दसिपौलिसें सम्मान याःगु खः । अथे हे उत्कृष्ट शिक्षकयात म्हतिं न्याद्वः तका दां व दसिपौ व् ब्वनेकुथियात दसिपौ लःल्हाःगु खः।
ज्याझ्वलय् नवासें तोखा नगरपालिकाया प्रमुख प्रकाश अधिकारीं शिक्षाया गुणस्तर थकायेत विद्यार्थी, शिक्षक व ब्वनेकुथिया उतिकं महत्वपूर्ण भूमिका दइ धासें गुणस्तर अप्वयेकेत हे थुकथं सम्मान यानागु खः धयादिल । वय्कलं तोखा नगर दुनेया ब्वनेकुथिं देय्न्यंकंया मेमेगु ब्वनेकुथिं स्वयां नं बांलाःगु लिच्वः हये फयेमा धासें थुकिया निंतिं सकसिनं मेहनत यायेमाः धयादिल ।
नगरपालिका शिक्षा शाखा प्रमुख बाबुराम गौतमं नगर दुनेया ब्वनेकुथिया शिक्षाया गुणस्तर अप्वयेके पुरस्कार व सम्मानया परम्परा न्ह्याकागु खः धासें थुकथंया ज्याझ्वलं वइगु दिनय् शिक्षण सिकाइ व क्रियाकलापयात न्ह्याः वनेत ग्वाहालि जुइ धयादिल ।
ज्याझ्वलय् नगर प्रमुख अधिकारी, उपप्रमुख मुरारी तामाङ, शिक्षा विकास समन्वय इकाइया प्रमुख नन्दलाल पौडेलं पुरस्कार व प्रमाण पत्र लःल्हानादीगु खः।
LEAVE YOUR COMMENTS