फ्रान्सय् तइगु जुल सत्यमोहनया झ्वाता

येँ -वाङ्मय शताब्दीपुरुष सत्यमोहन जोशीया झ्वाता फ्रान्सया छगू शहरय् तयेगु बारे फ्रान्सया मेयर व यल महानगरपालिकाया मेयर चिरिबाबु महर्जन दथुइ हस्ताक्षर जुइगु जूगु दु ।

यल महानगरपालिकाया प्रवक्ता राजु महर्जनं नेपालभाषा टाइम्सयात बियादीगु जानकारी कथं वंगु २४ गते मेयर महर्जन फ्रान्स झाःगु खः । फ्रान्सय् देय्न्यंकंया मेयरतय् सम्मेलनय् मूपाहां कथं मेयर महर्जन उखे झाःगु खःसा थुकिया दथुइ शताब्दी पुरुष जोशीया झ्वाता अन तयेगु बारे समझादारी जुइत्यंगु खः ।

उकथं हे फ्रान्सया छम्ह विशिष्ट व्यक्तिया झ्वाता नं यल महानगरपालिका दुने तयेगु तयारी जुयाच्वंगु खँ धाःगु दु । तर सुयागु झ्वाता तयेगु धइगु बारे स्पष्ट मजूनिगु खँ धाःगु दु ।

थःथःगु देय्या साहित्य व संस्कृतिया क्षेत्रय् योगदान याःपिं व्यक्तित्वया झ्वाता तयेबलय् अपनत्व व घनिष्टता अप्वयेकेत ग्वाहालि जुइगु खँ यल महानगरपालिकां धाःगु दु ।

मेयर महर्जनं नेपाःया नीन्यागू स्वयां अप्वः स्थानीय तह व फ्रान्सया थीथी स्थानीय तह दथुइ भगिनी सम्बन्ध स्थापना यायेगु ज्याय् समन्वय याना वयाच्वनादीगु खः ।