‘निम्ह अध्यक्ष नेकपाय् थें मखु’
राजेन्द्र श्रेष्ठ सहअध्यक्ष , हिसिला यमि उपाध्यक्ष
येँ – कन्हय् संसफो व नयाँ शक्ति पार्टी एकता जुयाः औपचारिक रुपं घोषणा जुइत्यंगु ‘समाजवादी पार्टी, नेपाल’ य् निम्ह अध्यक्ष दइगु खःसां थ्व निम्ह नेपाल कम्युनिष्ट पार्टीया निम्ह अध्यक्ष थें धाःसा मखुगु खँ उकिया नेता राजेन्द्र श्रेष्ठं कनादीगु दु ।न्हूगु निर्माण जुइगु पार्टीइ डा. बाबुराम भट्टराई संघीय परिषद्या अध्यक्ष जुइगु व उपेन्द्र यादव केन्द्रीय कमिटीया अध्यक्ष जुइगु खँ वय्कलं कनादीगु दु ।
संघीय परिषदं नीतिगत ज्याखँ याइसा केन्द्रीय कमिटीं पार्टीया ज्याखँ याइ । कार्यकारिणी अधिकार केन्द्रीय अध्यक्षयाके दइ । पार्टीइ दइपिं निम्ह अध्यक्षया हैसियत नेकपाय् थें बराबर हे याःसा जिउ धकाः डा. भट्टराईनं प्रस्ताव यानादीगु खःसां अथे यायेबलय् निगू शक्तिया द्वन्द्व्रं समस्या पिहां वइ धासें निम्ह अध्यक्षया हैसियत अलग अलग याःगु खः ।
पार्टीं चुनाव चिं धाःसा नगु (तारा) तयेगु निर्णय याःगु दु । थुकिया बारे धाःसा निर्वाचिन आयोगयाके न्यने मानिगु खँ धाःगु दु । पार्टी एकीकरण लिपा थ्व पार्टी देय्या हे स्वंगूगु तःधंगु पार्टी जुइ । निगुलिं दलया नेतातय्सं आः थःपिंत स्वंगूगु वैकल्पिक शक्तिया रुपय् न्ह्यःने यंकेगु खँ धायेगु यानाच्वंगु दु ।
संसफो व नयाँ शक्ति निगुलिं पार्टी थौंकन्हय् बिस्कं बिस्कं अस्तित्व ज्वनाः न्ह्यानाच्वंगु दुसां निगुलिं पार्टीया नेतातय् पृष्ठभूमि धाःसा वामपन्थी खः । एकीकरण लिपा नेपाःया आदिवासी जनजाति व मधेसी समुदायया पहिचानया मुद्दा ल्ह्वनीगु तःधंगु शक्ति धाःसा थ्वहे पार्टी जुइगु अनुमान याना हःगु दु । पार्टीया ध्वाँचय् आदिवासी जनजातिया पहिचानया चिं स्वरुप छगू रंग दइगु खँ नं धाःगु दु । २६ गते पार्टी दर्ता याइगु ग्वसाः दु ।
येँ ७ नम्बरय् राजेन्द्र श्रेष्ठ
संसफो व नयाँ शक्ति एकीकरण लिपा उगु पार्टीया नं सहअध्यक्ष जुयादीम्ह सांसद राजेन्द्र श्रेष्ठं आः वइगु चुनावय् येँया क्षेत्र नं. ७ पाखें उम्मेदवारी बीगु खँ कनादीगु दु । वय्कलं संसफोया छगू भेलाय् सम्बोधन यासें थ्व खँ सार्वजनिक रुपं धया नं दीधुंकूगु दुसा आः पार्टी एकीकरण लिपा उकिया लागिं तयारी समेत यायेगु खँ कनादीगु दु ।
भाजु श्रेष्ठ न्हापा एमालेय् दुबलय् वय्कलं थ्वहे क्षेत्रं चुनाव त्याकादीगु खःसा संविधानसभाया चुनावय् हिसिला यमि थ्व क्षेत्रं निर्वाचित जुयादीगु खः । निक्वःगु संविधानसभा व वयां लिपा जूगु आम चुनावय् धाःसा तत्कालीन एमालेया रामवीर मानन्धरं थनं निर्वाचित जुयादीगु खः । छगू कथं वामपन्थी गढ थें जुयाच्वंगु थ्व चुनाव क्षेत्रं आः थःपिंसं त्याकाः क्यनेगु खँ नं भाजु श्रेष्ठं धयादीगु दु । आः वय्कःया राजनीतिक गतिविधि थन केन्द्रित जुइगु खँ नं धाःगु दु ।
LEAVE YOUR COMMENTS