बाहिरी चक्रपथ छाय् दित ?

भूमाफियालिसे जानाः कित्ताकाट याःगुलिं समस्या

येँ – संघीय संसद अन्तर्गतया विकास समितिं बाहिरी चक्रपथया ज्या दिउगु कारण पेश यायेत सरकारयात झिंन्यान्हुया ई बिउगु दु ।
समितिया मंगलवाः च्वंगु बैठकं बाहिरी चक्रपथ अन्तर्गत चोभाःनिसें सतुंगः तकया ६.६ किलोमिटर ज्या दीवं शहरी विकास मन्त्रालययात कारण पेश यायेत निर्देशन बिउगु खः ।

उगु क्षेत्रय् जग्गा कित्ताकाटया कारणं सरकारयात चक्रपथ दयेकेगु ज्या न्ह्याकेत समस्या जूगु खः । चोभाः–गाम्चा–सतुंगः ६.६ किमि ताःहाकःगु दुरीया ३.५ किलोमिटर क्षेत्रय् थ्यंमथ्यं ७ द्वः मनूया जग्गा लानाच्वंगु दु । ९८ प्रतिशत जग्गाधनीं चक्रपथ दयेकेत सहमति प्वंकेधुंकूगु खःसां नं कित्ताकाटया ज्यां यानाः ज्या दिनाच्वंगु खः ।

बाहिरी चक्रपथया उगु खण्डय् त्रिभुवन राजपथ, पृथ्वी राजमार्ग, येँ–तराई द्रुतमार्ग व येँ–केरुङ मार्ग तकं स्वाइ । थ्व स्वयां न्ह्यः उगु लागाय् भूमाफियातय्सं चलखेल याःगु धासें शहरी विकास मन्त्रालयं उपत्यका विकास प्राधिकरणया प्रमुख आयुक्त भाइकाजी तिवारीयाके स्पष्टीकरण नं काःगु खः ।

प्रस्तावित पाइलट प्रोजेक्टय् भूमाफियातय्सं चलखेल याःगु धासें वंगु साउन २२ गते तिवारीयाके स्पष्टीकरण काःगु खः । शहरी विकास मन्त्री इस्तियाक राईनं उगु स्पष्टीकरण बीत निर्देशन बिउगु खः । भूमाफियालिसे जानाः तिवारीं उगु लागाय् ३ आनाया दरं ३ हजार गू कित्ताकाट यानातःगु लुइवं मन्त्रालयं बाहिरी चक्रपथया अलाइनमेन्ट हे हिलेगु कथं तयारी यानाच्वंगु दु ।

बाहिरी चक्रपथया निंतिं ७८०० रोपनी जग्गा अधिग्रहण यायेमाःगु खःसां नं चीधंगु कित्ताय् जग्गा कित्ताकाट याःगुलिं अन थीथी कथंया समस्या वये फइ धासें मन्त्री राईनं अलाइनमेन्ट हे हीकेगु कथं तयारी यानाच्वंगु खँ सीदुगु दु । बाहिरी चक्रपथ दयेकेगु डिपिआर २०७४ वैशाख १३ गते स्वीकृत जुइधुंकूगु खः ।

डिपिआर स्वीकृत जुइधुंकाः उगु लागाय् जग्गा कित्ताकाट यायेगु ज्या पनेमाःगु खःसां तिवारीं अःखतं भूमाफियालिसे जानाः कित्ताकाट याकाच्वंगु द्वपं लानाच्वंगु दु । बाहिरी चक्रपथ व खोनाया लागाय् आपालं स्थानीय जनताया जग्गा स्वनिगलं पिने च्वंपिंसं न्याना तयेधुंकूगु दुसा थुकिं थीथी राजनीतिक दलया नेतातय्सं नं सलंसः रोपनी जग्गा न्यानातःगु चर्चा दु ।