सहिद धर्मभक्त माथेमाप्रति श्रद्धाञ्जली

येँ- जहानिया राणा शासन अन्त्या निंतिं थःगु प्राण आहुति बिउपिं प्यम्ह महान सहिदमध्ये छम्ह सहिद धर्मभक्त माथेमाप्रति श्रद्धाञ्जली देछायेगु ज्याझ्वः जुल । वंगु माघ १० गतेनिसें न्ह्याःगु सहिद सप्ताह अन्तर्गत माघ १० गते न्हापांगु न्हि सहिद शुक्ररजा शास्त्री जोशीं अमरत्व प्राप्त याःगु टेकुइ वय्कःप्रति श्रद्धाञ्जली देछाःगु खः ।
थ्व झ्वलय् माघ १३ गते सहिद धर्मभक्त माथेमां सहादत प्राप्त याःगु सिफलय् वय्कःप्रति श्रद्धाञ्जली देछायेगु ज्या जूगु खः ।
येँ महानगरपालिकाया प्रमुख विद्यासुन्दर शाक्यं निरंकुशतापाखें नेपाःमि जनतयात मुक्त यायेत थःगु प्राण आहुति बिउपिं सहिदया हे कारणं थौं देशय् संघीय लोकतान्त्रि गणतन्त्र स्थापना जूगु खः धयादिल । लिसें वय्कलं सहिदया योगदानया उच्च मूल्यांकन यासें वय्कःपिंत चीरकालतक लुमंका तये फयेमा धकाः थगुने प्यम्ह सहिदया पूर्णकदया झ्वाता दयेकाः पलिस्था यानागु नं लुमंकादिल ।
येँ महानगरपालिकां थगुने सहिद शुक्रराज शास्त्री जोशी, सहदि धर्मभक्त माथेमा, सहिद गंगालाल श्रेष्ठ व सहिद दशरथ चन्दं सहादत प्राप्त याःगु थाय् छसिकथं टेकु, सिफः, शोभाभगवतीइ पूर्णकदया झ्वाता पलिस्था याःगु खः ।
थ्व बाहेकं सहिद धर्मभक्त माथेमाया लमुन्तिइ वय्कःया जन्म जूगु थाय् येँ महानगरपालिका वडा नं. २३ स्थित ओमबहालय् ‘सहिद धर्मभक्त माथेमा पार्क’ निर्माण याःगु खःसा सहिद गंगालाल श्रेष्ठया लमुन्तिइ गंगालाल हृदय रोग केन्द्रय् अक्सिजन प्लान्टटया निंतिं येँ मनपां सम्झौता याःगु खः ।
ज्याझ्वलय् येँ मनपा उपप्रमुख हरि प्रभा खड्गी श्रेष्ठं व ७ वडाअध्यक्ष शुद्धकुमार डंगोलं नं नुगःखँ तयादीगु ख ।

सम्बन्धित बुखँ

LEAVE YOUR COMMENTS