२४ म्हेसिके ओमिक्रोन पुष्टि

येँ – नेपालय् थप नीप्यम्हेसिके ओमिक्रोन भेरियन्टया संक्रमण पुष्टि जूगु दु । स्वास्थ्य तथा जनसंख्या मन्त्रालयया कथं लिपांगु इलय् २४ म्ह मनूया जिन सिक्वेन्सिङ याःगु खःसा उकी मध्ये फुक्कसिगुं हे नमूनाय् ओमिक्रोन भेरियन्ट पुष्टि जूगु खः ।

पुस महिनाय् संकलन याःगु कोरोना भाइरसया ११४६ पोजिटिभ नमूनाया स्क्रिनिङ याःगुली २५० गुली एस जिन नेगेटिभ वःगु खः । एस जिन नेगेटिभ वःगु मध्ये २४ गुली जिन सिक्वेन्सिङ याःगु खःसा उपिं फुक्कसिकें ओमिक्रोनया संक्रमण पुष्टि जूगु खँ मन्त्रालयया प्रवक्ता डा. संगिता कौशल मिश्रां धयादीगु दु ।

म्हिगः मन्त्रालयपाखें छगू विज्ञप्ति हे जारी थुकिया जानकारी बिउगु खः । विज्ञप्तिइ ओमिक्रोन भेरियन्टया कारणं तच्वया वने फइगु संक्रमितया चापयात ध्यानय् तयाः आः फुक्कं अस्पतालयात तयारी अवस्थाय् च्वनेत नं निर्देशन बियागु खँ नं न्ह्यथनातःगु दु ।
थ्वहे झ्वलय् म्हिगः न्हिछिया दुने देय्न्यंकं ९६८ म्हेसित कोरोना भाइरस संक्रमण जूगु दु । म्हीगया ल्याः स्वयां नं थ्व अप्वः खः । भारतय् कोरोना संक्रमण हानं विष्फोट जूगु कारणं नेपाःया सीमा लागाय् हानं संक्रमिततय् ल्याः अप्वया वःगु दु ।