अप्वः बलात्कार जःलाखःला पाखें

येँ –  दछिया दुने बलात्कार लिपा हत्या जूगु आपालं घटनाय् थःगु छेँया जःलाखःला हे ल्हाः दुगु खँ नेपाल प्रहरीया रिपोर्टं सीदुगु दु । वंगु आर्थिक दँय् देय्न्यंकं यानाः १४५३ गू बलात्कारया घटना जूगु खः । प्रहरीया तथ्यांक कथं म्हमसिउपिं पाखें ३८४ घटना (२६ प्रतिशत), थःगु हे छेँया परिवारपाखें १०९ घटना (८ प्रतिशत) थःथितिपाखें २८ घटना (२ प्रतिशत), पासापिं व जःला खःला पाखें ५२१ घटना (३६ प्रतिशत) व शिक्षक व मालिकपाखें न्यागू बलात्कारया घटना जूगु दु ।

चालु आर्थिक दँय् आः तक ५८८ बलात्कारया घटना जूगु प्रहरीया तथ्यांकं क्यंगु दु । गुकी म्हमसिउपिं पाखें २० घटना (३ प्रतिशत), थःगु हे छेँया परिवारपाखें ३२ घटना (४ प्रतिशत), थःथितिपाखें २० घटना, (३ प्रतिशत) पासापिं–जःला खःला पाखें २०९ घटना (२७ प्रतिशत), मेपिं म्हसिउपिं पाखें २८६ घटना (३७ प्रतिशत) व शिक्षक मालिकपाखें २१ घटना (३ प्रतिशत) बलात्कार जूगु दु ।

प्रहरीया कथं अवोध मिसामस्त व शारीरिक–मानसिक अवस्था कमजोर जूपिंत अप्वः बलात्कार घटना जूगु दु । प्रहरी तथ्यांक कथं छखा हे छेँया परिवार, नातेदार, छगू हे स्कुल वा कलेजय् ब्वनीपिं, पासापिं, शिक्षक, म्हसिउपिं पाखें ७४ प्रतिशत बलात्कारया घटना जूगु दु । म्हमसिउपिंपाखें २६ प्रतिशत बलात्कारया घटना जूगु दु ।

प्रहरीया तथ्यांक कथं चालु आर्थिक दँय् जबजस्ती करणीइ १४५३ मुद्दा दर्ता जूगु दु । उकी मध्ये १३७५ या सफल अनुसन्धान जूगु व ७८ थातिइ लानाच्वंगु मुक्कं घटनाया अनुसन्धानय् प्रहरीयात ९५ प्रतिशत सफलता चूलाःगु दावी प्रहरीया दु ।

सम्बन्धित बुखँ

LEAVE YOUR COMMENTS