किपू नपापाखें स्वास्थ्य केन्द्र स्थापना

किपू (नेपालभाषा टाइम्स) – किपू नगरपालिका वडा नं. २ या मैत्रीनगरय् शहरी स्वास्थ्य केन्द्र स्थापना याःगु दु । किपू नगरपालिकाया प्रमुख रमेश महर्जनं वंगु शनिवाः जूगु छगू ज्याझ्वःया दथुइ केन्द्रया उलेज्या यानादीगु खः ।

स्वास्थ्य केन्द्रया उलेज्या यासें नगरप्रमुख महर्जनं स्वास्थ्यय् सकसिगुं पहुँच दयेमाःगु खँय् बः बियादिल । वय्कलं कीर्तिपुर अस्पताललिसे मिले जुयाः नगरपालिकां सहुलियत भावं स्वास्थ्य बीमा यानाच्वनागु जानकारी बियादिसें सकसितं स्वास्थ्य बीमा यायेत नं इनाप यानादिल ।  नगरपालिकां ज्येष्ठ नागरिकयात निःशुल्क रुपं उच्च रक्तचाप व चिनी ल्वय्या वासः वितरण याना वयाच्वनागुलिइ आः केन्द्रया स्थापना लिपा सहज रुपं वासः उपलब्ध जुइगु नं वय्कलं जानकारी बियादिल । लिसें वय्कलं केन्द्रया स्थापनां वडा नं. १, २ व ३ तकया मैत्रीनगरवासीया निंतिं सहज जुइगु नं विश्वास प्वंकादिल । स्वास्थ्य केन्द्रयात सहज व सुचारु यायेगु निंतिं स्थानीय ल्याय्म्हतय्सं नं फक्व स्वयमसेवी भूमिका म्हितेत वय् कलं इनाप यानादिल ।

ज्याझ्वलय् विशेष पाहांकथं झायादीम्ह नगरपालिकाया उपप्रमुख सरस्वती खड्कां नगरपालिकां दक्वं नगरपालिकाय् समान रुपं विकासया ज्या यानाच्वनागु धयादिसें पुलांगु बस्तीइ च्वंपिंसं न्हूगु बस्तीइ व न्हूगु बस्तीय च्वंपिंसं पुलांगु बस्तीइ जक विकास यात धइकथंया गुनासो यायेगु यानाच्वंगु पाय्छि मजू धयादिल ।

‘भूगोलया आधारय् विकासया ज्या फरक जुइगु व सुगम थाय्या जक तुलना यायेगु पाय्छि जुइमखु’, वय्कलं धयादिल । किपू नगरपालिका वडा नं. २ या वडाअध्यक्ष रमेशमान महर्जनया सभापतित्वय् जूगु ज्याझ्वलय् किपू नगरपालिका स्वास्थ्य, फोहरमैला व वातावरण समितिया संयोजकलिसें वडा नं. १या वडाअध्यक्ष हर्षमान महर्जन, किपू नगरपालिका वडा नं. १० वडाअध्यक्ष अमन महर्जन, नगरपालिकाया स्वास्थ्य शाखा प्रमुख सन्तमान मानन्धरं नं थःथःगु नुगःखँ तयादीगु खः ।

सम्बन्धित बुखँ

LEAVE YOUR COMMENTS