संवैधानिक परिषद्या निर्णय नं विवादय्
येँ – संवैधानिक परिषद्पाखें देय्या थीथी संवैधानिक निकायया प्रमुख व दुजःतय् नियुक्तिया लागिं सिफारिस याःगु आः वइगु न्यान्हु लिपा ४५ न्हु पूवनी । सरकारं याःगु थ्व सिफारिसयात कयाः ४५ न्हु तक नं संसदया सुनुवाई समितिइ सुनुवाई जुइ मफुत धाःसा उपिं स्वतः नियुक्त जूगु ठहर जुइ धइगु कानुनी व्यवस्था दु । उकिं ४५ न्हु लिपा सरकारं सिफारिस याःपिं थ्व सकलें स्वतः नियुक्त जुइ धइगु तर्क सरकारं तयाच्वंगु दु ।
मेखे विपक्षीतय्सं धाःसा संसद हे मदुगु अवस्थाय् थ्व ४५ न्हुया कानुनी प्रावधान लागू जुइ फइ मखु धासें ४५ न्हु लिपा उपिं स्वतः नियुक्त जुइ फइ मखु धकाः जिकिर याना हःगु दु । उकिं सरकारं थीथी संवैधानिक निकायय् याःगु थ्व सिफारिस नं विवादय् लाइगु सम्भावना अप्वःगु दु ।
सरकारं संवैधानिक निकायय् थ्व सिफारिस यायेगु लागिं हे संवैधानिक परिषद्य् बहुमत सदस्य जक च्वनाः निर्णय याःसां जिउ धइगु कानून संशोधन सहित अध्यादेश जारी याःगु खः । अध्यादेश जारी जुइधुंकाः प्रम केपी ओली नापं सर्वोच्च अदालतया प्रधानन्यायाधीश चोलेन्द्र शम्शेर जबरा व राष्ट्रिय सभाया अध्यक्ष गणेश तिमिल्सिना स्वम्ह जक च्वनाः संवैधानिक निकायया पदाधिकारी नियुक्तिया निर्णय याःगु खः । संसद विघटनया सूचना वये स्वयां ६ मिनेट न्ह्यः जक थ्व सिफारिस संसदीय समितिइ पेश याःगु खः । विवादं यानाः आः ४५ न्हु लिपा थ्व नियुक्तियात कयाः नं कानुनी समस्या वइगु अनुमान याना हःगु दु ।
छु छु आयोगय् सु सु नियुक्त ?
विवादास्पद संवैधानिक परिषद्या बैठकं याःगु सिफारिस मध्ये दकलय् चर्चित नां खः पुलांम्ह गृहसचिव प्रेमकुमार राई । प्रम ओलीलिसे सतीम्ह राईयात अख्तियार दुरुपयोग अनुसन्धान आयोगया प्रमुख आयुक्त नियुक्त याःगु खः । लिसें आयुक्तय् जयबहादुर चन्द व किशोरकुमार सिलवालयात नियुक्त याःगु दु ।
अथे हे निर्वाचन आयोगया आयुक्तय् अधिवक्ता रामप्रसाद भण्डारी व डा. जानकी तुलाधरयात नियुक्त याःगु दु । राष्ट्रिय मानवअधिकार आयोगया अध्यक्षय् सर्वोच्च अदालतया पुलांम्ह न्यायाधीश तपबहादुर मगर, महिला आयोगया अध्यक्षय् कमला पराजुली, मधेसी आयोगया सदस्यय् जिवछ साह, रेणुदेवी शाह व विजय गुप्ता, आदिवासी जनजाति आयोगया अध्यक्षय् रामबहादुर थापा, थारु आयोगया सदस्यय् विकास चौधरी, बबिता चौधरी, सुवोधसिंह चौधरी व भोलाराम थारुया नां सिफारिस याःगु खः ।
LEAVE YOUR COMMENTS