डब्लुएनओया तःमुँज्या ताःलाकेत सहलह

यल – वल्र्ड नेवाः अर्गनाइजेसन (डब्लुएनओ)या न्ह्यःने वयाच्वंगु निक्वःगु तःमुँज्या ताःलाकेगु निंतिं छगू सहलह मुँज्या जुल । वंगु शनिवाः यलया सातोआकी भवनय् नेपालभाषा थीथी ख्यःया प्रतिनिधिपिंलिसें तःमुँज्या तःजिक हनेगु बारे सहलह जूगु खः । अर्गनाइजेसनया नेपाः च्याप्टरया नायः शाक्य सुरेनया सभापतित्वय् जूगु ज्याझ्वलय् तःमुँज्या ग्वसाः खलःया कजि पुष्कर माथेमां तःमुँज्या ताःलाकेत थीथी ख्यलं म्हितेमाःगु भूमिकाया बारे कनादीगु खः ।

थ्व हे वइगु ने.सं. ११३९ चिल्लागा अस्तमिनिसें दशमि (मार्च २८–३०) तक स्वन्हुयंकं जुइगु वल्र्ड नेवाः अर्गनाइजेसनया निक्वःगु तःमुँज्या ताःलाकेत नेपालभाषा ख्यःया बौद्धिक, साहित्यिक, सांस्कृतिक, सांगीतिक, शैक्षिक व संचार ख्यःपाखें दुग्यंगु ग्वाहालि दइगु आशा यासें थ्व सकतां ख्यलं ग्वाहालि दत धाःसा तःमुँज्या नं ताःलाइगु विश्वास प्वंकादिल ।

सहलह मुँज्याय् ब्वति कयादीपिंसं विश्वय् नेवाः एकता ब्वयेगु निंतिं सकसिनं थःथःगु खलः, पुचः दुने सहलह ब्याकाः फूचाःगु ग्वाहालि यायेगु प्रतिवद्धता प्वंकूगु खः । लिसें उगु सहलहया क्वछिनायात दबूया मुँज्याय्तक थ्यंकेगु बचं नं वय्कःपिंसं बियादीगु खः ।

अथे हे उगु सहलह मुँज्यां नेवाःतय् पहिचान हे न्हनीकथं स्वनिगःया नेवाःतय्त विस्थापित यायेगु ल्याखं सरकारं हयाच्वंगु थीथीकथंया योजना व दमनयात दबाव बीगु ल्याखं प्रस्ताव यंकेगु मुँज्यां क्वःछीमाःगु निष्कर्ष नं पिकाःगु खः ।