कीर्तिमानी सिरियल किलर

सुनानं चायेकं वा मचायेकं मनू स्यात धाःसा अज्याःम्ह मनूयात समाजं पितिना छ्वइ । मनू स्याःम्हेसित दँदँ जेलय् कुनी, अझ आजीवन कारावासया सजाय बी । मनुखं मनू स्यायेगु थेंज्याःगु जघन्य अपराध थ्व संसारय् मेगु दइमखु । भारतया छम्ह मनुखं थःगु जीवनय् गुसः मनूयात स्यानाः समाजय् जक मखु मुक्कं भारतय् आतंक न्यंकूगु दु ।

खतुं विश्वय् आपालं ‘सिरियल किलर’त दु । थज्याःपिंसं छम्ह लिपा मेम्हसित स्यायेगु व समाजय् आतंक न्यंकेगु ज्या याइ । थथे हे दँ दँ न्ह्यः भारतय् नं छम्ह अज्याःम्ह हे सिरियल किलर दुगु खः, गुम्हेसिनं हत्याया मामिलाय् विश्व कीर्तिमान हे कायम याःगु दु । उम्ह सिरियल किलरया नां खः ठग बेहराम ।

‘किंग अफ ठग’ नामं नं म्हसिउम्ह ठग बेहरामं सन् १७९० निसें सन् १८४०या अवधि तक आपालं मनू स्याःगु खः । तसकं कुख्यात अपराधीकथं म्हसिउम्ह वयागु नांजक न्यनेवं उगु ईया अंग्रेजततकं तसकं ग्याः । वयागु लुटपाट न्यंकेगु शैली व हत्याया तरिका नं तसकं ग्यानापु जक मखु, उलि हे रहस्यमय नं जू ।

धाइ नापं कि गुगु लँपु जुयाः ठग बेहराम वनी, अन लासया द्वँ चिनेगु शुरु जुइ । थःगु इलय् गिरोहया नाइके तकं जुयाच्वंगु ठग बेहरामं थःगु भेष हिलाः पर्यटक, व्यापारीतय् दथुइ घुलमिल जुइगु व मौका वयेवं इमित स्यानाः ध्यबा लुटे याइगु खः । भारतीय संचारमाध्यमया छगू रिपोर्टकथं ५० दँया अवधिइ ठग बेहरामं ९३१ म्ह मनूया हत्या याःगु खः ।

वं हत्याया द्वपं नं स्वीकार याःगु खः । रोचक खँ ला थ्व दु कि ठग बेहरामं मनू स्यायेत छुं अज्याःगु जःगु ल्वाभः वा मेगु छुं नं ज्याभः छ्यलीगु मखु, वं न्ह्याबलें नं छकू रुमाल घाना तइगु खः, व नं म्हासुगु, अले व हे रुमालं मनूतय् गःपय् हिनाः स्याइगु खः । थुकथं मनूतय् गःपतय् रुमालं जक हिनाः वं गुसः स्वयां अप्वः मनू स्याःगु खः ।

वयागु हत्या व अपराध गिनिज बुकय् तकं दर्ता जूगु दु । ठग बेहरामं थःगु श्रृंखलावद्ध हत्या विशेष यानाः जबलपुरं ग्वाहालियर जुयाः दिल्ली वनेगु लँपुइ जक याइगु खः । सन् १८४० य् ७५ दँया उमेरय् ठग बेहरामयात ज्वनाः वयात फाँसीया सजाय बिउगु खः ।भारतय् ठग बेहरामया नां शीर्ष झिम्ह सिरियल किलरया रुपय् दकलय् न्ह्यःने लाः ।

थ्व बाहेकं मेपिं नं अज्याःपिं आपालं सिरियल किलरत दु, गुपिंसं याःगु हत्या थुलि विभत्स, थुलि ग्यानापु, उलि हे घृणित रुपं नं इमिसं मनू स्यायेत लिफः मस्वः। थ्व झ्वलय् सन् १९६० या दशकय् मुम्बइ सहरया सिरियल किलर राघव रमण विषययात कयाः संकिपा तकं निर्माण यानाः प्रदर्शनय् हःगु दु । भारतय् सिरियल किलर्सतय् इतिहास नं तसकं पुलां जूगु अनया संचार माध्यमं इलय् ब्यलय् न्ह्यथनेगु याः ।

 

सम्बन्धित बुखँ

LEAVE YOUR COMMENTS