प्रदेशया भाषा सिफारिस तयारी, बागमती प्रदेशय् नेवाः व तामाङ

येँ -देशय् संघीय व्यवस्था लागू जुइधुंकाः देय्या भाषानीति निर्धारण यायेगु लागिं गठन याःगु भाषा आयोगं थःपिनि सिफारिस लःल्हायेगु तयारी यानाच्वंगु खँ सीदुगु दु । सरकारं गठन याःगु भाषा आयोगया अध्यक्ष डा. लवदेव अवस्थी खःसां उकी छम्ह बाहेक मेपिं दुजःत थपे मयाःगु कारणं थ्व आयोग हे पूर्ण जूगु मदुनि । तर न्यादँ तक नं आयोगयात अपूर्ण रूपं तयातःगु खःसां आः धाःसा आयोगया अध्यक्ष लगायतया दुजःतय्सं छु छु प्रदेशय् छु छु भाषा प्रयोग यायेगु धइगु सिफारिस सरकारयात लःल्हायेगु तयारी यानाच्वंगु खः ।

भाषा आयोगय् अध्यक्ष नापं ७ म्ह दुजः दयेमाःगु खःसां थौंकन्हय् निम्ह जक तयातःगु दु ।

आयोगं नेपालय् आः विद्यमान ७ गू प्रदेशय् खस नेपाली भाषा बाहेक मेगु छु छु भाषायात सरकारी ज्याखँया भाषा कथं प्रयोग यायेमाः धकाः सरकारयात सिफारिस याइगु खः । छु छु प्रदेशय् खस नेपाली बाहेक मेगु छु छु भाषायात सरकारी ज्याखँया भाषा दयेकेमाः धइगु खँयात कयाः प्रदेशस्तरय् आयोगं माःगु सहलह ब्याकेधुंकूगु दु । आयोगं थज्याःगु सहलह स्थानीय तहलय् समेत ब्याकूगु खः ।

आयोगपाखें थ्व सिफारिस लःल्हाये धुंकाः उकियात लागू यायेगु ज्या संघीय सरकारं याइ । आयोगयाके सिफारिस यायेगु जक अधिकार दु । यदि आयोगया सिफारिस सरकारं लागू यायेगु जुल धाःसा वहे अनुरुप कानून दयेकाः कार्यान्वयन याइ ।

भाषा आयोग गठन यानाः प्रदेशया ज्याखँया भाषा निर्धारण यायेगु खँ संविधानय् हे उल्लेख यानातःगु दु । संविधानय् हे व्यवस्था यानातःगु आयोगं याःगु सिफारिस जूगुलिं सरकारं लागू याइ धइगु विश्वास कयातःगु दु ।

बागमती प्रदेशय् नेवाः व तामाङ
भाषा आयोग सूत्रं जानकारी बिउकथं थीथी प्रदेशय् २०६८ सालया जनगणना कथं अन भाय् ल्हाइपिं मनूतय् संख्या कथं सरकारी ज्याखँया भाषा निर्धारण याःगु दु । थ्व ल्याखं बागमती प्रदेशय् खस नेपाली बाहेक नेपालभाषा व तामाङ भाय्यात सरकारी भाषा दयेकेमाःगु सिफारिस आयोगं याःगु दु ।

उकथं हे आयोगं प्रदेश १ य् मैथिली, लिम्बू व राई वान्तवा भाषा, प्रदेश २ लय् मैथिली व भोजपुरी, गण्डकी प्रदेशय् मगः व गुरुङ, लुम्बिनी प्रदेशय् डगौरा थारु व अवधी, कर्णाली प्रदेशय् मगः व खस भाषा अले सुदूरपश्चिम प्रदेशय् डोटेली व रानाथारु भाषायात सरकारी ज्याखँया भाषा दयेकेमाःगु सिफारिस यायेत्यंगु दु ।

सम्बन्धित बुखँ

LEAVE YOUR COMMENTS