
येँ – नेपाल कम्युनिष्ट पार्टी (नेकपा) या अध्यक्ष लिसें प्रधानमन्त्री केपी शर्मा ओलीं पार्टीया जिल्ला, जनसंगठन व तहया कमिटी तत्काल पुनर्गठन यायेत निर्देशन बिउगु दु । नुवाकोटया येँ जिल्लाय् दुपिं अगुवा कार्यकर्ता भेलायात म्हिगः सम्बोधन यासें वय्कलं प्रतिनिधिसभा विघटन जुयाः निर्वाचनया मिति घोषणा जुइधुंकूगुलिं जनस्तरय् वनाः सक्रिय जुइत इनाप यानादीगु खः ।
सम्बोधनया झ्वलय् प्रम ओली धयादी, ‘प्रतिनिधिसभा पुनस्र्थापना जुइ वा निर्वाचन जुइमखु धइगु भ्रमय् मच्वनेत जिं इनाप यानाच्वना । झीसं कयागु सही बिचाः व देय्या समृद्धिया निंतिं जिं सकसितं छप्पँ जुयाः पार्टीया शुद्धिकरण अभियानय् न्ह्यायेत इनाप यानाच्वन ।’
अध्यक्ष ओलीं पार्टीं ‘जनताया बहुदलीय जनवाद’ या मूलभूत विचारया मार्गदर्शनया आधारय् थौंकन्हय् जनताया जनवादया विचार कयागु खँ धासें उकियात बुलुहुँ परिमार्जन यायेफइगु खँ नं धयादीगु दु । वय्कलं पार्टी विभाजन यायेत स्वइपिंके छुं नं कथंया विचार मदुगु दावी नं यानादीगु दु । वय्कलं थःपिंसं हिंसा विश्वास मयायेगु बरु जनताय् विश्वास यायेगु खँ धासें लडाकुया नामय् वा निर्वाचनय् नामय् जूगु अनियमितता आः मजुइगु खँ नं धयादीगु दु ।
LEAVE YOUR COMMENTS