पुनरावलोकन : सरकारया मृगमरिचिका
स्वनिगः दुने सरकार सतक विस्तार यायेगु नामय् थनया स्थानीय मनूतय्गु छेँबुँ बिना मुआब्जा लाका कायेगु ज्या याये दइमखु धकाः सर्वोच्च अदालतं बिउगु निर्णय विरुद्ध पुनरावलोकनया निंतिं वर्तमान सरकारया भौतिक मन्त्री महावीर सेठं महान्यायाधिवक्ता मार्फत सर्वोच्च अदालतय् निवेदन दर्ता याःगु दु ।
आःया लोकतन्त्रया सरकार धयातःगु केपी ओलीया सरकारं आम जनताया संविधान प्रदत्त सम्पत्तिया हक अधिकारयात हे हाथ्या बियाः जनताया सम्पत्ति सितिकं काये दयेमाःगु अधिकारया माग यासें उगु पुनरावलोकन निवेदन दर्ता याःगु खः ।
विकासया नामय् वंगु डा. बाबुराम भट्टराईया प्रधानमन्त्रीया कालय् स्वनिगःया स्थानीयवासीतय्गु छेँबुँ बिना मुआब्जा पुलिसया शक्ति छ्यलाः लाका कायेगु ज्या याःगु खः । सरकारया जग्गा प्राप्ती ऐनयात तकं वेवास्ता यानाः प्रशासनं डोजर छ्यलाः ऐतिहासिक व सांस्कृतिक सम्पदा तकं नष्ट यायेगु ज्या याःगु व सरकारया जबर्जस्तीयात विरोध याःपिंत कुनेगु व ख्याच्वः बियाः बिना मुआब्जा आम नागरिकया सम्पत्ति हड्पे याःगु खः ।
सरकारया उगु नीति पाय्छि मजूगुया विरोधय् आपालं सडक संघर्ष जुल, अन्तत पीडिततय्सं सर्वोच्च अदालतय् सरकार विरुद्ध मुद्दा तयाः थःपिनिगु संविधान प्रदत्त हक सम्पत्तिया सुरक्षाया प्रत्याभूतिया माग याःगु खः । थुगु हे मुद्दाय् सम्माननीय सर्वोच्च अदालतं सुयागुं नं निजी सम्पत्ति सरकारं कायेगु खःसा उकिया उचित मुआब्जा बीमाःगु, सरकारं जग्गा प्राप्ती ऐनयात लागू यायेमाःगु व अथे छेँ–बुँ मदयेक निजी जग्गा कायेगु खःसा अज्याःपिनि उचित बसोवासया ब्यवस्था यायेमाःगु फैसला बिउगु खः ।
क्षतिपूर्ति बियाः जग्गा प्राप्ती यायेमाःगु खःसा सरकारया ५० अर्ब दां खर्च जुइगु जिकिर यासें न्हापा थें हे सडक विस्तारया निंतिं निजी सम्पत्ति लाका काये दयेमाः धयागु आसय तयाः उगु फैसलाया पुनरावलोकनया निवेदन दर्ता याःगु खः ।
सर्वोच्च अदालतया उज्वःगु फैसलाया पूर्ण विवरण वयेवं वर्तमान सरकारं सर्वोच्च अदालतयात विकास विरोधीया द्वपं बियाः अथे क्षतिपूर्ति बियाः जग्गा प्राप्ती यायेमाःगु खःसा सरकारया ५० अर्ब दां खर्च जुइगु जिकिर यासें न्हापा थें हे सडक विस्तारया निंतिं निजी सम्पत्ति लाका काये दयेमाः धयागु आसय तयाः आः उगु फैसलाया पुनरावलोकनया निंतिं निवेदन दर्ता यायेधुंकूगु दु ।
सर्वोच्च अदालतया स्वम्ह सम्माननीय न्यायाधीशपिंसं याःगु फैसला चित्त बुझे मजूसा उकिया पुनरावलोकनया निवेदन तये दइगु कानुनी प्रावधान दु । आः थुगु पुनरावलोकनया मुद्दा न्याम्ह न्यायाधिशपिनिगु पुर्ण इजलासं स्वयेगु याइ । स्वनिगःयात ब्यवस्थित यायेगु व विकासया नामय् थनया रैथानेतय्गु सम्पत्तिया हक लाका कायेगु ज्या छथ्वः मनूतय्सं न्हापांनिसें हे यानाच्वंगु खंके फइ ।
थुमिसं हरेक ऐतिहासिक, सांस्कृतिक व धार्मिक महत्वया सम्पदा नष्ट यानाः अन भौतिक संरचना दयेकेगु जक मखु दयेके धाःपिं निजी ब्यवसायीतय्त तकं खने मदयेक तिबः बीगु ज्या जुयाच्वंगु दु । पंचायतकालीन इलय् थुज्वःगु सम्पदा नष्ट यायेगु आपालं ज्या जूगु दु । यलया राजकुलो व सप्ततालयात हे न्हंकाः अन ततःधंगु भौतिक संरचना दयेका तःगु दु ।
यल महानगरपालिकाया पूच्वय् च्वंगु महानगरपालिकाया भवन तकं सप्तताल पुरे यानाः निर्माण जूगु खँ आः अनया जेष्ठ नागरिकतय्सं अझं धायेगु यानाच्वंगु दु । मेखेर ठमेलया कमलपुखू न्हंकाः भराय्दंगु ब्यवसायिक होटल निर्माण जुयाच्वंगु दु । अनया गुथियारतय्सं ब्यापक विरोध यानाच्वंगु खःसां सम्बन्धित निकायतय्सं वेवास्ता यानाः निर्माण ज्या याना हे च्वंगु दु ।
वर्तमान स्थिति स्वनिगः दुने सडक तब्या जक यानाः थनया यातायात समस्या मज्यनीगु खँ आःया अनुभवं स्पष्ट यायेधुंकूगु दु । नेवाःतय्गु प्राचीन वस्ती व सलंसःदँ निसें वसोवास यानाच्वंपिं रैथाने नेवाःतय्त विस्थापित यायेगु निंतिं राज्यशक्ति अनेक तिकडम याना वयाच्वंगु दु । नेवाःतय्गु छेँ–बुँ लाका कयाः आः विस्तार याःगु सतकय् नं यातायात साधन चले यायेगु स्वयां अन अव्यवस्थित पार्किङ्ग यायेगु बाहेकया मेता ज्या जुयाच्वंगु मदु ।
सरकारया यातायात ब्यवस्थित यायेगु सोच व योजना मदु । सडकय् यातायात जाम जूगुया कारण सतक चिब्या जूगु व सतक तब्या यायेया निंतिं अनया छेँ थुनेमाःगु हचुवाया नीति नालाः तसकं हे अब्यवहारिक व अव्यवस्थित रुपं छेँ थुनेगु ज्या याःगु खः । थःपिनिगु सम्पत्तिया रक्षाया निंतिं सतकय् कुहां वःपिंत दुव्र्यवहार यानाः पुलिसं अश्रुग्यास व कथिं मुइकेगु ज्या यात ।
तब्या याःगु सतकय् यातायात सहज याये मफुगु कारणं आःया इलय् अन हे दकले ताःहाकः व अप्वः यातायात जाम जुयाच्वंगु प्रत्यक्ष खंकेफइ । सर्वोच्च अदालतं निजी सम्पत्ति कायेगु खःसा उकिया मुआब्जा बीमाः धकाः याःगु फैसलां अथे मुआब्जा बियाः सतक विस्तार याये फइ मखु, सरकारयाके श्रोत व साधन मदु धयागु हे आःया पुनरावलोकनया जिकिर खः ।
सरकारं वास्तविकरुपं हे मुलुकय् विकासया लहर हयेगु, ततःधंगु भौतिक निर्माण यायेगु खःसा उकियात आवश्यक बजेटया ब्यवस्थाया जिम्मेवारी नं सरकारयागु हे जुइमाःगु खँय् निता बिचाः मदु । सरकारं छेँया मुआब्जा बियाः सतक निर्माण याये मफइगु, सतक निर्माण यायेगु फुक्क खर्च मुआब्जाय् बी मालीगु जिकिर यानाच्वंगु दु ।
सर्वोच्च अदालतया छगू न्यायोचित फैसलायात अन्य तरिकां हाथ्या बीगु ज्या लोकतन्त्र सम्मत मखु । यदि सरकारं जबर्जस्तिकथं फैसला पुनरावलोकनया मुद्दा न्ह्यःने यंकेगु खःसा थुकिं सरकारप्रति अनादर व अनास्था ब्वलनी । थ्व लोकतान्त्रिक सरकारया निंतिं ल्वःगु ज्या मखु ।
जनताया पक्षय् जूगु न्यायोचित फैसलायात अन्यकथं थुइकाः जनताया सम्पत्ति बिना मुआब्जा काये फइ धयागु म्हगस यदि सुना नं खंकाच्वंगु खःसा व मृगमरिचिका बाहेक मेता मजुइगु खँ सम्बन्धित सरकारी निकायया मनूतय्सं इलय् हे वाःचायेकेमाः ।
LEAVE YOUR COMMENTS