परराष्ट्र मन्त्रीया किपा तकं विवादय्

भारतीय मन्त्रीयात कुटनीतिक मर्यादा अःखः नमस्कार

येँ (नेपालभाषा टाइम्स) – भारत भ्रमणय् वंम्ह परराष्ट्र मन्त्री प्रदीप ज्ञवालीया भ्रमण जक मखु, भ्रमणया झ्वलय् खिचे यानातःगु वय्कःया किपा समेत आलोचित जूगु दु। वय्कलं भारतीय रक्षामन्त्री राजनाथ सिंहया न्ह्यः छ्यं क्वछुकाः नमस्कार यानाच्वंगु किपा सार्वजनिक जुइवं सामाजिक सञ्जालय् उकियात कयाः व्यापक रुपं आलोचनात्मक टिप्पणी जूगु खः ।

भारतया ‘हिन्दुस्तान टाइम्स’ पत्रिकां उगु किपा सार्वजनिक याःगु खः । किपाय् परराष्ट्रमन्त्री ज्ञवालीं भारतीय रक्षामन्त्री सिंहया न्ह्यःने क्वछुनाः नमस्कार यानाच्वंगु दुसा सिंह धाःसा थम्हं नमस्कार यायेगु पलेसा ज्ञवालीया हे ल्हाः ज्वनाच्वंगु दु। उगु किपायात भारतीय पत्रिकां तसकं महत्व बियाः छापे याःगु खः ।

प्रधानमन्त्री केपी ओलीया दूत जुयाः भारत भ्रमणय् वंम्ह ज्ञवालीया भ्रमण सिबें नं भारतीय मन्त्रीयात भागि यायेगु वय्कःया शैलीयात कयाः नेपालय् आलोचना शुरु जूगु खः । थुकियात आलोचकतय्सं कुटनीतिक आचरण विपरित शैली धयाहःगु दु। मनूतय्सं थुकियात ‘जिमिसं गल्ती याये लात, क्षमा याना बिउ प्रभू’ धायेगु शैलीया नमस्कार जुल धयाहःगु दु ।

परराष्ट मन्त्री ज्ञवालीयात भारतीय प्रधानमन्त्री नरेन्द्र मोदीं नापमलासे लित छ्वया हःगु खँ नं थ्व इलय् चर्चाया विषय जुयाच्वंगु दु। नेपालय् जूसा भारतया कर्मचारीयात तकं प्रधानमन्त्रीं नाप लायेगु तर भारतय् नेपाःया परराष्ट्र मन्त्रीयात तकं भारतं नापलाःगु धइगु प्रम ओलीया लागिं नं अपमान खः धयाहःगु दु ।