ने. सं. ११४४ कौलाथ्व पारू - नःलास्वनेगु

मनपायात २८ वडाया पौ ः ‘खुलामञ्चय् वडायाके मन्यंक छुं दयेके दइ मखु’

येँ (नेपालभाषा टाइम्स)- येँ महा नगरपालिकां खुलामञ्च स्यंकाः अन फुटबल ग्राउण्ड दयेकेगु धकाः हःगु योजना कार्यान्वयन मयायेत येँ मनपा २८ वडा ज्याकूपाखें मनपायात सतर्क याःगु दु । थ्व खुलामञ्च मनपाया २८ वडाय् लाः धासें अन वडाया स्वीकृति मकासे छुं हे ज्या याये मते धकाः मनपायात पौ छ्वःगु खः ।

२८ वडाया वडा अध्यक्ष भाइराम खड्गी (प्रकाशं) मनपाया सार्वजनिक निर्माण विभागयात पौ छ्वसें थ्व इनाप यानादीगु खः । पतिइ २८ वडा लागाय् लाःगु खुला मञ्च धइगु येँया पहिचान व धरोहर खः, उकिं थुकियात संरक्षण, संवद्र्धन व सुधार यायेगु थःपिनि दायित्व खः धासें अन वडाया स्वीकृति मकासे छुं नं निर्माणया ज्या याये मते धकाः इनाप यानातःगु दु ।

वडापाखें छ्वःगु पतिइ वडा अध्यक्ष भाइराम खड्गी लगायत वडा सदस्यपिं मीनाकुमारी खड्गी, ललिता कार्की ढली व विरेन्द्र महर्जनं नं सही यानादीगु दु । मनपां अन फुटबल ग्राउण्ड दयेकेत छगू करोड तका दांया बजेट समेत फ्याये धुंकूगु खँ नं वडाया पतिइ न्ह्यथनातःगु दु । मनपां अन फुटबल ग्राउण्ड दयेकेगु लागिं नक्सा सहित तयार यानातःगु योजना नं सार्वजनिक जूगु दु ।

येँया सिडियोयात ज्ञापन
येँया खुला मञ्च स्यंकाः अन फुटबल ग्राउण्ड दयेकेत्यंगु खँया विरोध यासें म्हिगः ‘अकुपाई टुँडिखेल’ नांगु अभियानपाखें येँ जिल्लाया सिडिओयात ज्ञापनपौ लःल्हात । अभियानया नायः विजय श्रेष्ठया नेतृत्वय् वंगु पुचलं येँया सिडिओ जितेन्द्र बस्नेतयात ज्ञापनपौ लःल्हाःगु खः ।

ज्ञापनपौ लःल्हाना कासें सिडिओ बस्नेतं खुला मञ्च धइगु येँया छगू खुल्ला सार्वजनिक सम्पत्ति जूगु कारणं अन छुं नं कथंया संरचना दयेकाः मनूयात पहुँचं पिने तये दइ मखु धयादिल । थुकिया बारे थम्हं मनपाय् स्वापू तयाबलय् नगर प्रहरी प्रमुख राजुनाथ पाण्डें अनं छुं दयेकेत्यनागु मखु, अप्पा जक प्वलागु खः धकाः थःत लिसः बिउगु जानकारी नं वय्कलं बियादिल । वय्कलं धयादिल, ‘व खुल्ला थाय् खः । अन छुं कथंया संरचना दयेकल धाःसा जिमिसं वनाः पनेगु जुइ ।’

ज्ञापनपौ बीत पुलांम्ह मन्त्री भिमसेनदास प्रधान, उमेश स्थापित, गणपति लाल श्रेष्ठ आदिपिं नं झाःगु खः ।