टिकटक बन्द विरुद्ध सर्वोच्चय् झिगू रिट
येँ (नेपालभाषा टाइम्स)÷नेपाल सरकारं टिकटक बन्द यायेवं उकिया विरुद्ध सर्वोच्च अदालतय् मुद्दा दर्ता जूगु दु । उगु मुद्दायात कयाः कंस मंसिर ४ गते सुनुवाइ जुइगु ई बिउगु दु ।
म्हिगः पेश जूगु रिट निवेदन दर्ता यासें सर्वोच्च अदालतं मंसिर ४ गतेया नितिं न्हापांगु पेशी क्वःछिउगु खः । टिकटक बन्द यायेगु सरकारया निर्णय विरुद्ध म्हिगः छन्हुं हे झिगू रिट दर्ता जूगु खः । मंसिर ४ गते उगु फुक्कं मुद्दायात कयाः एकल इजलासय् सुनुवाइ जुइ ।
टिकटक मार्फत सार्वजनिक शिष्टाचार सम्बन्धी कसुर अप्वया वःगु व टिकटक कम्पनीं थ्वपाखें जुइगु अपराध पनेत व दोषीयात कारबाही यायेत ग्वाहालि मयाःगु धासें नेपालय् तत्कालया नितिं टिकटक बन्द यायेगु निर्णय सरकारं याःगु खः । कार्तिक २७ गते मन्त्रिपरिषदया बैठकं टिकटक प्रतिबन्ध तयेगु निर्णय यायेवं नेपाःया आपालं धयाथें इन्टरनेट सेवा प्रदायकं टिकटक चले मजुइगु सरकारया निर्णय खारेज यायेमाःगु माग यासें सर्वोच्च अदालतय् रिट दायर याःगु खः ।
सरकारं टिकटक बन्द यायेवं थुकियात कयाः सार्वजनिक व राजनीतिक रुपं नं आपालं कथंया वहस शुरु जूगु दु । टिकटक धमाधम छाडा व अराजक जुया वःगु कारणं थुकियात नियन्त्रण यायेमाःगु व थुकिया लागिं कानून दयेकेमाःगु माग अप्वःस्यां याना हःगु दु । बन्द हे यायेगु निर्णययात धाःसा यक्वस्यां आलोचना याना हःगु दु । टिकटक मार्फत आपालं मनूतय्सं रोजगारी समेत याना वयाच्वंगु दु ।
LEAVE YOUR COMMENTS