सिलाई तालिमया प्रशिक्षार्थीतय्त दसिपौ

थिमि (नेपालभाषा टाइम्स) – सिद्धिकाली सिलाई प्रशिक्षण केन्द्रया ग्वसालय् स्वलायंकं जूगु सिलाई प्रशिक्षणय् सहभागि प्रशिक्षार्थीतय्त दसिपौ इनेगु ज्या जुल । केन्द्रया ग्वसालय् मध्यपुर थिमिया मिसातय्त लक्षित यानाः लेभल १ व २ या सिलाई प्रशिक्षण बिउगु खः । केन्द्रया अध्यक्ष सुष्मा श्रेष्ठया सभापतित्वय् जूगु ज्याझ्वलय् मूपाहांकथं झायादीह मध्यपुर थिमि नगरपालिकाया उपप्रमुख अञ्जनादेवी मधिकःमिं ज्याझ्वःया उलेज्या यानादीगु खः ।

तालिमय् सहभागि पीम्ह प्रशिक्षार्थीपिंत मूपाहां उपप्रमुख मधिकःमि व पुलांम्ह नगरप्रमुख मदनकृष्ण श्रेष्ठं दसिपौ लःल्हानादीगु खः । तालिमय् लेभल १या प्रशिक्षण गंगा अवाल व लेभल २ या प्रशिक्षण केन्द्रया अध्यक्ष श्रेष्ठं बियादीगु खः । तालिम समापन ज्याझ्वलय् मूपाहां, पुलांम्ह नगरप्रमुख, प्रशिक्षक तुल्सीकृष्ण श्रेष्ठ, गोरी इन्टरनेशनल टेक्निकल एकेदेमिया अध्यक्ष राजेन्द्र राउत, मध्यपुर थिमि नगरपालिका वडा नं. ४या वडाअध्यक्ष कुमार श्रेष्ठ लगायतं नुगःखँ तयादीगु खः ।

ज्याझ्वलय् प्रशिक्षार्थीतय्सं तालिमपाखें प्राप्त सीपकथं थःपिंसं हे सुयातःगु वसःया ब्वज्या याःगु खःसा सांस्कृतिक ज्याझ्वः नं न्ह्यब्वःगु खः ।