अंगुलिमाल नाटक सफू पिदन

थिमि – अहिंसाया सन्देश बीगु ‘अंगुलिमाल’ नांया बहुभाषिक सफू पिदंगु दु । साहित्यकार रामेश्वर भुजुं च्वयादीगु उगु सफू थनया शंखधर चोकय् जूगु छगू ज्याझ्वःया दथुइ विमोचन याःगु खः । तत्कालीन इलय् सिद्धार्थ गौतम बुद्धं हिंसात्मक आचरणया अंगुलिमालयात अहिंसाया लँपुइ वनेत प्रेरित यानाबिज्यासे थः शिष्यतकं दयेकूगु बाखं लिधंसाय् उगु सफू च्वयागु च्वमि भुजुं कनादिल ।

सफुयात कयाः समीक्षा यानादिसें नेपाल साहित्य मन्दिरया नायः तिलकप्रकाश कायस्थं संसारय् शान्तिपूर्ण वातावरण सिर्जना यायेगुु स्वयेमाः धयादिल । वय्कलं हिंसां मानव जीवनय् दीर्घकालीन रुपं नकारात्मक लिचवः लाकीगु जूगुलिं थुगु सफुतिं सकसितं हिंसाप्रति विकर्षण हयेगु ज्याय् ग्वाहालि याइगु विश्वास प्वंकादिल ।

साहित्यकार भुजुं आखः ब्वंकादीपिं विद्यार्थीपिं ज्ञानकृष्ण श्रेष्ठ, इन्द्रकृष्ण श्रेष्ठ, चन्द्रकृष्ण श्रेष्ठ (गोपाल) व लक्ष्मीबहादुर श्रेष्ठया पुचलं उगु सफ प्रकाशनय् हःगु खः । ज्याझ्वलय् प्रदेश नं. ३ या सदस्य डा. राजेन्द्रमान श्रेष्ठ, मध्यपुर थिमि नगरपालिकाया प्रमुख मदनसुन्दर श्रेष्ठ, प्रा. डा. पुरुषोत्तमलोचन श्रेष्ठ, साहित्यकारपिं नरेन्द्रभक्त हाडा, त्रिरत्न शाक्य, ध्रुव मधिकःमि लगायतपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS