कुँचय् लाकमं प्यंकीपिं

जितः शायद कम्युनिष्ट बिचाः येयाः खः ला वा पासापिं अप्वः धयाथें कम्युनिष्ट बिचाःयापिं जुयाः खः ला वा अभिवाकत नं कम्युनिष्ट बिचाःयापिं जुयाः खःला जि मचानिसें, स्कुलनिसें कम्युनिष्ट बिचाः पाखेलाः वन । स्कुल निसें क्याम्पस, विश्वविद्यालय थ्यंक नं जितः कम्युनिष्ट बिचाः नं साला तल । थौं जीवनया उत्तरार्धय् तक नं जितः व बिचालं मत्वःतूनि ।

स्कुल जीवननिसें हे कम्युनिष्ट पार्टीइ ज्या यानाः कम्युनिष्ट पार्टीया थीथी आन्दोलनय् सुहभागी जुयाः ल्यायम्ह इलय् हे पटक प टक जेलनेल भोगय् याना । ल्याय्म्ह इलय् हे जितः कम्युनिष्ट पार्टीया सदस्यता बिल । जितः इलय् ब्यलय् नेपाली कांग्रेसया पासापिंसं उमिथाय् सालेत मस्वःगु नं मखु। जिं उमित ग्वाहालि याना, पासा याना, तर कम्युनिष्ट पार्टी त्वःताः धाःसा थौंतक नं मवनानि । वने मफुनि । जनताया पार्टी धकाः जनताया भावना नापं मिलेजूगु पार्टी धकाः मेथाय् गनं मवना ।

जि छम्ह यलय् जूगुलिं जमानाय् यलय् कम्युनिष्ट नेतात अप्वः च्वनाच्वंगुलिं जिगु उपिं नाप संगत जुल । हानं जेलय्च्वनाः मनमोहन अधिकारी, निर्मल लामा आदि थेंज्याःपिं उबलय्या नेतातनाप २०१८/१९ सालय् जेलय् च्वनाः छगू हे भुतुली नयाः, छपाः हे लासाय् द्यनाया संगत जुल । जितः उमिगु बिचाः, बानी व्यवहार अझं सालाकाल । व इलय् जि च्वनागु नख्खु जेल । जुजु महेन्द्रं सैनिक कू यानाः कुनातःपिं कांग्रेस कम्युनिष्ट नेतात जेलय् जायेक दुगु। नेपाली कांग्रेसया बहुमत सरकारयात अपदस्थ यानाः सत्ता थःगु ल्हातय् कयाः विरोधी पार्टी नेतात जक मखु जि थेंज्याःम्ह छम्ह सदस्ययात तक कुनाब्यूगु खः, जेल हे जायेक ।

ई न्ह्याना वन । थःथःगु बिचाः कथं क्षमता कथं पासापिं गुलिं भ्वं यानाः पिहां वल, गुलिं जेलय् हे च्वनाच्वन । जितः हानं जेलय् च्वनाच्वनेगु जिगु क्षमतां मब्यू । जि नं भ्वं यानाः पिहां वया । जि हानं ब्वनाः ज्या यानाः जागिर नयाः । डाक्टरी तक पास याना । थौंतक नं जि पार्टीया ल्यूल्यू हे दनि । अय्नं आःतक पार्टीपाखें छुं ग्वाहालि, सहयोग वा शुभलाभ याये मफुसां थम्हं चाहिं फुथाय्, ज्यूथाय् ग्वाहालि याना हे च्वना । स्वास्थ्यकःमि जुयाः स्वीदँ जुजुया जागिरनया । व इलय् तप्यंक पार्टीइ सने मफु ।  जागिर फुतं नं हानं जि काठमाडौं मोडेल अस्पतालय् लाःवल । व इलय् मोडेल अस्पतालयात एमाले अस्पताल धाइगु। अप्वः यानाः बाम बिचाःयापिं डाक्टरत प्रशासकत, गुकिं यानाः जिगु बिचाः अझ सशक्त जुल ।

नेकपाया चहपह थथे हे जुयाच्वन धाःसा आः वइगु लिपाया चुनावय् उमिसं अवश्यं नं चाइ, भोगय् याइ । ई दनि ? लाःनि । वा चायेकि, सकलें मिले जुयाः जन पक्षया ज्या यानाः अझ जनताया नुगःत्याके लाःनि । अन्यथा मखु धइगु खःसा मलाका कपाः तिया च्वनेगु खःसा मेगु छुं यायेफइमखु ।

जुजुया सरकार क्वःदल, प्रजातन्त्र वल । ग्याःचिकु म्हां जुल । पार्टीइ खनेदयेक सने फया वल । इलय् ब्यलय् एमालेया सरकार नं वल । थौंतकया नेपाल सरकारय् नां कायेबहःपिं प्रधानमन्त्री दःसा व हे विपि, मनमोहन व कृष्णप्रसाद भट्टराई हे जक खनेदत । मेपिं ला नयेद्यःचात हे जक जुल । कम्युनिष्ट नेतात जमानानिसें हे मिले जुइ मफयाः थःथः ल्वानाः कुचा कुचा दलाः बमलात, बहुमत हयां नं सरकार न्ह्याके मफु । सकलें तःधं जुइमाःपिं । क्वय् च्वने सुयां मयःपिं । थःगु सरकार थम्हं क्वःथलिपिं ।

छकः जिगु त्वालय् एमाले पाखें नेतात वयाः प्रचार प्रसार याःवल । सभा यात । सभाया नायः जितः दयेकल । सकसियां पाः वने धुंकाः न्ववायेगु जिगु पाः वल । जिं व हे कथं नेतात मिले मजू, थः हे ल्वाना जुइगु, थम्हं प्रधानमन्त्रीयात थःम्हं पितिनिगु, पार्टीया नेताया विषययात कयाः जिं छकूचा थज्याःगु खँ न्ववानाबलय् अन दुपिं नेतात वयाः जिगु म्हुतुप्वाः तिकः वल । आः पार्टी अथे गुट उपगुट मन्त, सकलें छप्पँ जुइधुंकल धकाः जितः न्ववाके हे मब्यू ।

माओवादी व एमाले मिलय् जुल । चुनावय् स्वब्वय् निब्व (दुइ तिहाई) बहुमत हल । कम्युनिष्ट पार्टीत जक मखु, सकलें जनता व नेतात आःला स्थीर सरकार वइ, देय् विकास जुइ धकाः तःधंगु आशा यात । केपी वल हानं प्रधानमन्त्री जुल, तर थौं वयाः नेपाःमित वली पाखें नेकपाया सरकार पाखें थुलि निराश जुलकि सरकार प्रति विश्वास व भरोसा हे मदयाः वन । स्वब्वय् निब्व बहुमत दुगु सरकारं जनताया पक्षय् चित्त बुझे जुइक बांलाःगु छुं हे ज्या क्यने मफुत । पार्टी दुने हे ल्वापु जुल ।

प्रधानमन्त्रीयात कुंखिना हल । प्रधानमन्त्रीं जनताया न्ह्यसःयात नं, पार्टीया न्ह्यसःयात नं चित्त बुझे जुइक लिसः बीमफुत । अःखः पार्टीया बैठकपाखें बिसिउँ जुइगु जक यानाहल । आखिरय् प्रधानमन्त्री वलीं थःगु सत्ता बचे याना तयेगु लागि कुँचय् लाकमं प्यंकल । संसद हे विघटन याना बिल । संविधानय् मदुगु प्रावधान छ्यल । राष्ट्रपति नं स्वीकार यानाः संसद क्वःथला बिल । नेतातय् थ्व ल्वापुं यानाः जनता निराश जुल ।

जि जक मखु जि थें ज्याःपिं मचां निसें बाम बिचाः ज्वनाः नेकपा लिसे स्वानाच्वंपिं अप्वः धयाथें पासापिं आः ला नेकपायात मत बीम्वाल, नेकपां देय् दयेके मफुत धयाथें बिचाः याना हयेधुंकल ।चुनाव जूगु थौं स्वदँ मदुनि, बछि धयाथें बाम विचाःयापिंसं वइगु चुनावय् सुयात भोट बीगु धयागु मनय् तयेधुंकल । उमिगु मन ख्वये धुंकल । नेकपापाखें नुगः चिरिबाये धुंकल ।

नेतातय् थज्याःगु ल्वापुं यानाः जनतात छखे चिलावंगु स्वयेबलय्ला व छम्ह प्रधानमन्त्री मखु छम्ह ध्याच्चु व हास्यव्यंग्यया प्रखर लेखक थें खनेदु। विरोधी पार्टीया मनूयात ब्वःबीगु वयागुबोलि स्वयेबलय् ला व नाप इपिं हानं मिले जुइगु थाय् हे मदु थें च्वं । प्रधानमन्त्री वलीया कथं देशय् गाक्क जनपक्षीय ज्या जूगु दु। जनपक्षया ज्या खनाः ग्यानाः विरोधी मनूतय्सं सरकार क्वःथले त्यन धकाः अःखः खँ ल्हानाजुल । गुलि मछाः मजूगु, गुलि फताह खँ ल्हाये फुगु। भिंगु ज्या याःम्ह सरकार सुनां क्वथली ला ? आः सरकारं कुँचय् लाकमं न्याये धुंकल । थःगु तुतिइ थःम्हं पां पाले धुंकल । सवोच्च अदालतय् प्रधानमन्त्री पक्षया वा विरोधी पक्षय् न्ह्यागु फैसला याःसां देसय् ला शान्ति अमनचैत स्यनीगु हे जुल । हानं क्वाःघासा सरकार वइगु हे जुल । अले ज्या मदयाः न्हिंन्हिं तिंख्यलय्, लगंख्यलय् पशुपति आदि थासय् नये मखना ज्या मदयेकाः म्वानाच्वंपिनिगु ख्वाः सुनां स्वइगु? उखु किसानतय् पीडा सुनां स्वइ ? भ्रष्टाचारं देय् गालय् क्वब्वानाच्वंगु दु। स्वयं अख्तियारया भूपू प्रमुखयात तकं कुनेमाःगु अवस्था वःगु दु। स्वदेशं ज्या मदयाः ल्वय् खनाः मग्यासे हुल का हुल जनता विदेश वनाच्वंगु दु, सुनां स्वइगु? थज्याःगु सरकारया बेथितित थन च्वयां साध्य मजू । च्वःपिंसं च्वयाच्वंगु दु, सरकारं न्यनाच्वंगु मदु। सचेत जुयाच्वंगु मदु ।

जि राजनीतिज्ञ मखु। राजनीतिया च्वसुं नं च्वये मसः । अय्सां देय्या परिस्थिति, देय् भताभुङ, लथालिङ जूगु खनाः मनय् थहां वइगु ग्वारा, दना वइगु भावना सुचुका तये मफयाः धायेमाला वइगु खः, च्वये मास्ति वइगु खः । तर सरकारं न्यंगु मखु। न्यनाः ज्या याःगु मदु। यदि नेकपाया चहपह थथे हे जुयाच्वन धाःसा आः वइगु लिपाया चुनावय् उमिसं अवश्यं नं चाइ, भोगय् याइ ।

ई दनि? लाःनि । वा चायेकि, सकलें मिले जुयाः जन पक्षया ज्या यानाः अझ जनताया नुगःत्याके लाःनि । अन्यथा मखु धइगु खःसा मलाका कपाः
तिया च्वनेगु खःसा मेगु छुं यायेफइमखु ।

सम्बन्धित बुखँ

LEAVE YOUR COMMENTS