स्वस्थानी व्रतया झ्वलय् बाग्लुङय् झिंखुदँ लिपा ‘लँ दायेगु’ धर्म

येँ – स्वस्थानी व्रत क्वचायेकेगु झ्वलय् माघ शुक्ल पुन्हि शनिवाः कुन्हु बाग्लुङय् ‘लँ दायेगु’ धर्म हंगु दु । झिंखुदँ न्ह्यव निसें दिनाच्वंगु थ्व धर्म हनेगु ज्या नेवाः ल्याय्म्ह पुचः बाग्लुङया संयोजनय् जूगु खः । शनिवाः कुन्हु पवित्र कालीगण्डकी खुसिं निसें बाग्लुङ बजाः तक लँय् तुयु कापःया बासा लानाः ‘लँ दायेगु’ धर्म हंगु खः ।

‘लँ दायेगु’ झ्वलय् स्वम्हेसिनं श्रहर्षधारा हायेकीगु कलश क्वबिइगु व छम्हेसिनं तुयुगु बासाय् द्यःनां लँ दायाः वनेगु ज्या जूगु खः । थ्व झ्वलय् गुलिसिनं भगवान शिवया भेषय् फल प्रसाद ग्रहण यायेगु यानावनीसा गुलिसिनं कालीगण्डकीया जल ह्वला वनी । कालीगण्डकी खुसिं लँ दायेगु सुरु यानाः बाग्लुङ बजाःया भिंद्यःयाथाय् थ्यंकाः क्वचायेकीगु खः ।

‘झीगु संस्कार, संस्कृति न्हना वनाच्वंगु अवस्थाय् थ्व जात्रायात जीवन्त यायेत हाकनं न्ह्याकागु खः’ नेवाः ल्याय्म्ह पुचः बाग्लुङया नायः जय राजभण्डरीं धयादिल ।

‘न्हापा न्हापां दँय्दसं स्वस्थानी व्रत क्वचाइगु न्हि कुन्हु थ्व जात्रा हना वयाच्वंगु खः, तर ल्याय्म्हत विदेश वनीगु लहर वयेवं थ्व जात्रा नं दिना वन’ धयादिसें संस्थाया सचिव निलेश राजभण्डारीं धयादिल, ‘नेवाः ल्याय्म्ह पुचःया गठन हे थथे न्हना वंगु जात्रापर्व हाकनं न्ह्याकेत, झीगु भाषा, रहनसहन, नखःचखः परपम्परा, प्याखंयात निरन्तरता बीगु निंतिं हे जूगु खः । थ्व हे कथं थुगुसी ‘लँ दायेगु’ जात्रायात हाकनं न्ह्याकेगु ज्या जुल ।’

संस्था दुजः दिप रत्न श्रेष्ठं झिंखुदँ लिपा न्ह्याःगु जूसां थुगुसी जात्रा सफलपूर्वक क्वचाःगु खँ कनादिल । महाद्यःयात लय्तायेकेत व्रत च्वनीपिंसं जात्राया झ्वलय् कालीगण्डकी खुसिं हःगु जल त्वनेगु व थःके दुगु जल तनाबियाः बजाः चाहिलेगु ज्या जुइ । थ्यंमथ्यं २५० दँ न्ह्यव स्वनिगलं बाग्लुङ वःपिं नेवाःतय्सं वि.सं. २००७ साल पाखे थ्व जात्रा न्ह्याकूगु स्थानीय अग्रज नेवाःतय्सं कनादीगु दु ।

सम्बन्धित बुखँ

LEAVE YOUR COMMENTS