भद्रगोल राजनीतिइ पृथ्वी दिवस

येँ (नेपालभाषा टाइम्स) – संसद विघटन जुयाः देशय् भद्रगोल अवस्था जुयाच्वंगु इलय् मेखे थौं शाहवंश स्थापना याःम्ह जुजु पृथ्वीनारायण शाहया बुन्हि तःजिक हनेगु तयारी जुयाच्वंगु दु । थौंया न्हियात राष्ट्रिय एकता दिवसया रूपय् हनेगु झ्वलय् वंगु छुं ई न्ह्यवंनिसें थीथी ज्याझ्वः जुयाच्वंगु खः ।

पुलांम्ह जुजु ज्ञानेन्द्र शाहं थ्व लसताय् छगू वक्तव्य पित बिसें पृथ्वी नारायण शाहं उगु इलय् नेपाः एकीकरण याःगुया लिउने दैविक आशीर्वादया समेत भूमिका दुगु खँ उल्लेख यानादीगु दु । लिपांगु इलय् देशय् ब्वलंगु अस्थिरता प्रति इंगित यासें वय्कलं थौं झीत देश गय् यानाः बचे यायेगु धइगु चिन्ता जुयाच्वंगु खँ समेत न्ह्यथनादीगु दु । वय्कलं राष्ट्रिय एकता कायम जुइमा धकाः थःपिंसं राजगद्दी त्याग यायेगु तकया उच्च साहस प्रदर्शन यानागु खँ नं वक्तव्य न्ह्यथनादीगु दु ।

उखे नेपाली सेनां थ्वहे लसताय् पृथ्वी नारायण शाहं गोर्खांनिसें वयाः येँ देय् त्याकेत युद्ध याःबलय् छ्यःगु लँपुयात ‘गोरखा-काठमाडौं एकीकरण मार्ग पदयात्रा’ धइगु नां तयाः सेनाया छगू टुकडीया पदयात्रा याकूगु दु । उगु टुकडी म्हिगः येँय् थ्यंकः वःगु खः । थ्वहे लसताय् सेनां छगू कविता धेंधेंबल्लाः कासा समेत याःगु खः ।

थुकिया नापनापं थौं नेपाल प्रज्ञा परिषद्पाखें नं छगू ज्याझ्वः यासें पृथ्वी नारायण शाहया १९९ दँ बुन्हि न्यायेकेत्यंगु दु । पृथ्वीनारायण शाह सुं साहित्यकार मखुसां नं छगू साहित्यिक संस्थां पृथ्वी दिवस न्यायेकूगु खँय् साहित्यकारतय्सं हे आलोचना याना वयाच्वंगु दु । थौंया न्हियात विशेष रूपं न्यायेकेगु लागिं वंगु छुं ई न्ह्यवंनिसें सीपी मैनाली, मनिषा कोइराला, रमेश खरेल आदि समेत दुथ्याःगु छगू पुचलं तयारी याना वयाच्वंगु खः ।

सम्बन्धित बुखँ

LEAVE YOUR COMMENTS