वाः मचायेक कोरोना संक्रमण जूपिं लुइकीगु सेरो परीक्षण जुइगु

येँ (रासस) – स्वास्थ्य तथा जनसंख्या मन्त्रालयं कोरोना भाइरस समुदायस्तरय् न्यनावंगु दु कि मदु अध्ययन याइगु जूगु दु। इपिडिमियोलोजी तथा सरुवा रोग नियन्त्रण महाशाखां कोरोना भाइरसं गुलि मनूतय्त प्रभावित यात धकाः स्वयेत ‘सेरो प्रिभिलेन्स सर्वेक्षण’ सुरु यायेत्यंगु खः । विश्व स्वास्थ्य संगठनया ग्वाहालिं सुरु याइगु थ्व परीक्षणं कोरोना भाइरस संक्रमण जुयाः नं वाःमचायेक हे लनेधुंकूपिंत नं कोरोना संक्रमण जूगु दु कि मदु धयागु तकं सीदइगु खँ धाःगु दु ।

सेरो परीक्षण हिया माध्यमं याइ, उकिं आः महाशाखां संक्रमण अप्वः जूगु थासय् वनाः हिया नमूना संकलन यायेगु ज्या याइ । पिसिआर परीक्षण स्वाब पाखें याइगु खः । पिसिआरं तत्काल सक्रिय भाइरस जक पत्ता लगे याइगु खःसा सेरो सर्वेक्षण न्हापा भाइरस संक्रमण जूपिंत नं पत्ता लगे याइगु खँ धाःगु दु ।

महाशाखाया निर्देशक डा. वासुदेव पन्तं धयादीगु दु, ‘पिसिआर परीक्षणं तत्काल समुदायय् कोरोना संक्रमणया अवस्था छु दु धकाः क्यनी, तर सेरो परीक्षणं न्हापा छुं हे लक्षण हे खनेमदयेक कोरोना संक्रमण जुयाः नं लनेधुंकूपिनिगु अवस्था बारे नं सीकेफइ ।’

नेपालय् कोरोना पुष्टि जूपिं मध्ये नं ९७ प्रतिशतयाके छुं लक्षण हे खनेमदुगु खः । महाशाखाया वरिष्ठ जनस्वास्थ्य प्रशासक महेन्द्रध्वज अधिकारीं धयादी, ‘कोभिड १९या संक्रमणं गुलिखे मनूत थःथवं तुं लनावंगु दु। उमित संक्रमण जू खःकि मखु धयागु हे सीमदु। उकिं अज्याःपिं मनूतय्के दुगु भाइरसया अवस्था नं सेरो सर्भेलेन्सपाखें सीदइ ।’

सेरो सर्भेलेन्सं भाइरस संक्रमण जूपिं मनूतय् हिइ भाइरसविरुद्ध गुलि एन्टिबडी पिहांवल धयागु सीके फइ । ‘मनूतय्के ल्वय् लिसे ल्वायेगु क्षमता दइ, थ्व हे ल्वय् लिसे ल्वायेगु एन्टिबडी गुलि वल धयागु स्वयेत नं सेरो सर्भे जुइत्यंगु खः’ वय्कलं धयादीगु दु ।

नेपालय् म्हिगः तकया दुने कोरोना संक्रमण पुष्टि जूपिनि ल्याः १७ हजार ८४४ म्ह थ्यंगु दु। म्हिगः छन्हुं जक १८६ म्हेसिके कोरोना संक्रमण पुष्टि जूगु खः ।