नेवाः देय् दबूया २५ दँ बुन्हि न्यायेकल

येँ – थीथी ख्यलय् योगदान बियाच्वंपिं नेवाः व्यक्ति व संस्थायात थीथी स्वंगू सिरपाः लःल्हासें नेवाः देय् दबूया २५ दँ बुन्हि न्यायेकल ।
थनया नेपाः ब्यांक्वेटय् म्हिगः जूगु छगू ज्याझ्वःया दथुइ गिरिधरलाल नेपाल– भाषा सेवा सिरपाः साहित्यकार छत्रबहादुर कायस्थयात, नारायणदेवी–तीर्थ व्यवसायी प्रोत्साहन सिरपाः अञ्जना ताम्राकारयात व नारायणदेवी–तीर्थ समाजसेवा सिरपाः विराटनगरया झी पुचःयात लःल्हाःगु खः ।

स्वंगुलिं सिरपाः छगू छगू लाख तकाया खः । मदुपिं नारायणदेवी मानन्धर, तीर्थनारायण मानन्धर व गिरिधरलाल मानन्धरया काय म्ह्याय् लिसें जहानपिंसं थ्व सिरपाः पलिस्था यानादीगु खः । नेवाः देय् दबूया नायः नरेश कुमार ताम्रकारया सभापतित्वय् जूगु ज्याझ्वलय् विशेष पाहां कथं प्रदेश नं. ३ या सभामुख सानुकुमार श्रेष्ठ झाःगु खः ।

थीथी जातीय खलःया प्रतिनिधि लिसें पाहांपिंसं नीन्याप्वाः सुकुन्दा च्याकाः ज्याझ्वःया उलेज्या याःगु खः । ज्याझ्वलय् नेवाः न्ह्यलुवा मल्ल के. सुन्दर, प्रकाश पालिखे लिसें नेवाः देय् दबूया संस्थापक लिसें पुलांपिं मूदुजःपिं नापं अन्तर्राष्ट्रिय बडी बिल्डिङ कासाय् स्वर्ण पदक त्याकादीम्ह कासामि महेश्वर श्रेष्ठयात दोसल्लां न्ययेकाः हनेगु ज्या नं जूगु खः । ज्याझ्वलय् ४ नं. प्रदेशया न्वकु शंकरनारायण श्रेष्ठं लसकुस यानादीगु खःसा डा. पुष्पराज राजकर्णिकारं सिरपाः बारे कनादीगु खः ।

अन्तिमय् मूपाहां हिलाबुला
नेवाः देय् दबूया २५ दँ बुन्हिया लसताय् जूगु ज्याझ्वलय् मूपाहां कथं ब्वनातःम्ह संस्कृतिमन्त्री योगेश भट्टराईयात अन्तिमय् वयाः मसःतेगु ज्या जूगु दु । थँबहीया छायादेवी कम्प्लेक्सया उलेज्या याःम्ह जुयाः वय्कःयात मूपाहां दयेकल धाःसा देय् दबूया ज्याझ्वः पिने हे धर्ना बीगु जुइ धकाः सम्पदाप्रेमितय्सं ख्याच्वः बिउगु जुयाः देय् दबुलिं अन्तिमय् वयाः भट्टराईयात मूपाहां मदयेकेगु निर्णय याःगु खः ।

संस्कृति मन्त्री भट्टराईयात मूपाहां मदयेकेगु लागिं नेवाः राजनीतिक अभियानं देय् दबूयात ज्ञापनपौ हे बियाः इनाप याःगु खः । देय् दबुलिं मन्त्री भट्टराईयात मसःतूगु खँय् सुभाय् बिसें नेवाः राजनीतिक अभियानं थुकिं नेवाः भावनाया सम्मान याःगु दु धकाः लसता प्वंकूगु दु । ेय् दबूया ज्याझ्वलय् म्हिगः विशेष पाहां कथं प्रदेश नं. ३ या सभामुख सानु श्रेष्ठं ब्वति कयादीगु खः ।

सम्बन्धित बुखँ

LEAVE YOUR COMMENTS