जगतसुन्दरय् मिनि संग्रहालय

येँ – जगतसुन्दर ब्वनेकुथिइ वंगु शुक्रवाः छगू बःचाःधंगु ज्याझ्वःया दथुइ मिनि संग्रहालय चायेकेगु ज्या जुल । संग्रहालयय् थीथी हलज्वलं दुथ्याकातःगु दु । उगु मिनि संग्रहालयय् चायेकेत ख्वपया मल्ल प्रधाना· प्रतिष्ठानं आवश्यक हलंज्वलंया ग्वाहालि यानादीगु खःसा ब्वनेकुथिया हे न्हापांम्ह प्रिन्सिपल मय्जु रत्नदेवी कसां नेवाःतय्सं न्हापा छ्यलाबुलाय् हयाच्वंगु चाया थलबल बियाः ग्वाहालि यानादीगु खः ।

अथे हे मदुम्ह सान महर्जनया नामं क्वतः ज्वलं ग्वाहालि यानादीगु खःसा मेमेगु हलंज्वलं धाःसा ब्वनेकुथिं हे व्यवस्था याःगु खः ।
संग्रहालयय् नेवाःतय् परम्परागत तिसा, वसः व थलबलं नापं मेमेगु नं आपालं हलंज्वलं ब्वया तयागु जानकारी बियादिसें ब्वनेकुथिया प्रिन्सिपल मय्जु सुनिता मानन्धरं संग्रहालययात तब्या याना यंकेत सकसितं ग्वाहालिया निंतिं इनाप नं यानादिल ।

संग्रहालय चायेकेत प्रतिष्ठानया कार्यसमितिया सकल दुजःपिं नापं आजीवन सदस्य व सल्लाहकार यानाः झिंछम्हेसिनं ग्वाहालि यानादीगु खः । उगु इलय् प्रतिष्ठानया नायः डा. माधवसुन्दर मल्लं ब्वनेकुथिया संचालक समितिया अध्यक्ष लक्ष्मीदास मानन्धरयात दराजया ताःचा लःल्हानादीगु खः ।

सम्बन्धित बुखँ

LEAVE YOUR COMMENTS