सिसडोलय् ल्वापु

येँ – स्वनिगःया फोहर वांछ्वयेगु थाय् सिसडोलय् आन्दोलनरत स्थानीयवासी व प्रहरी दथुइ ल्वापु जूगु दु । छवाः न्ह्यवंनिसें फोहर वाके मबीवं येँ महानगरपालिकाया छपुचः वार्ताया निंतिं सिसडोल वंगु खः । स्थानीयवासी व येँ मनपा प्रतिनिधि दथुइ जूगु वार्ता मिले मजुइवं स्थानीयवासी व प्रहरी दथुइ झडप जूगु खः ।

थ्व ल्वापुइ लानाः छुं स्थानीय व छुं प्रहरी घाःपाः जूगु खँ धाःगु दु । महानगरीय प्रहरी परिसर येँया प्रमुख प्रहरी वरिष्ठ उपरीक्षक उत्तमराज सुवेदीं वार्ताय् सहमति मजुइवं घ्वात्तुघ्वायेगु झ्वलय् छुं प्रहरी व स्थानीय सामान्य घाःपाः जूगु खँ धाःगु दु । सिसडोलया स्थानीयवासीतय्सं क्षतिपूर्तिया पुनरावलोकन यायेमाःगु माग यासें आन्दोलन सुरु याःगु खः ।

उमिसं ल्यान्डफिल साइडया निंतिं छ्यलाच्वंगु जग्गा नं अधिग्रहण यायेमाःगु माग यानाच्वंगु दु । स्थानीयवासीतय्सं सिसडोलय् फोहर वाके मबीवं छवाः न्ह्यवंनिसें स्वनिगलय् फोहर उठे याये मफयाच्वंगु दु । थन फोहर वाके मबिउगुलिं छेँय् छेँय् फोहर काःवइपिं निजी कम्पनीतय्सं नं फोहर काः वयाच्वंगु मदु । फोहर उठे मजूगुलिं स्वनिगःया थाय्थासय् फोहरद्वँ मुनेगु सुरु जूगु दु ।