नेवाः हाइकु मुना निगूगु ब्व पिदन

येँ (नेपालभाषा टाइम्स) – नेवाः हाइकु ख्यःपाखें निगूगु पिथनाकथं ‘नेवाः हाइकु मुना’ निगूगु ब्वया पितब्वज्या जूगु दु । सफू पितब्वज्या ज्याझ्वलय् नेपाल संवत्यात कयाः नं चर्चा नं जूगु खः । सामाजिक संजाल फेसबुकपाखें वाःपतिकं छपाः किपा बियाः उकिया हे लिधंसाय् च्वयातःगु हाइकुयात मुनाः हाइकु मुना निगूगु ब्व पिथंगु खः । तुयू पुंनं मुनादीगु सछि व झिम्ह हाइकु च्वमिपिनिगु हाइकू उगु सफुतिइ दुथ्याकातःगु दु ।

ईलोहं प्रकाशनया प्रबन्ध निर्देशक नरेशवीर शाक्यं छगू ज्याझ्वःया दथुइ उगु सफूया पितब्वज्या यानादीगु खः । ज्याझ्वलय् नवासें वय्कलं सफूया पिथना नेवाः साहित्यया ख्यलय् छगू ज्वः मदगु दसू जूगु व हाइकु छु खः व थुकिया रचना गुकथं यायेमाः धइगु सिइकाः हाइकुया रचना याये फत धाःसा उकिं हाइकूया मर्मयात पिब्वयेत ग्वाहालि जुइगु विश्वास प्वंकादिल ।

ज्याझ्वलय् मंगलनारायण जोशी दया खड्गी बेचैन, पूर्णिमा शाक्य, मिलन शाक्यपिंसं हाइकु वाचन यानादीगु खःसा साहित्यकारलिसें समालोचक ध्रुव मधिकःमिं टिप्पणी यानादीगु खः । ज्याझ्वलय् नेपाल संवत्या छ्यलाबुलायात कयाः नं चर्चा जूगु खः । नेपाल संवत्या छ्यलाबुलाय्व्य वहारिक पक्षयात कयाः प्रा. डा. भगवानदास मानन्धरं चर्चा यानादीगु खः ।