चीहाः संकिपा ‘मिसा व तिसा’या न्हापांगु प्रिमियर शो
यल (नेपालभाषा टाइम्स) – नेपालभाषाया चीहाः संकिपा ‘मिसा व तिसा’या न्हापांगु प्रिमियर शो वंगु थिंलाथ्व पुन्हि (यःमरि पुन्हि)कुन्हु थनया खपिन्छेँ त्वाःया भैलः लाछिइ क्यनेगु ज्या जुल ।
चीहाः संकिपाया न्हापांगु प्रिमियर शो क्यने ज्याझ्वलय् यल महानगरपालिका वडा नं. १९या वडाअध्यक्ष राजु महर्जन मूपाहांकथं झायादीगु खःसा खपिन्छेँ त्वाःया मूगुरु अष्टलाल महर्जन, चिच्या मोतिलाल महर्जन, नेवाः पत्रकार राष्ट्रिय दबूया नायः सुरजवीर वज्राचार्य, सिने पत्रकार विजयरत्न असंबरे विशेष पाहांकथं झायादीगु खः ।
समाज दुने खने दयाच्वंगु लोभ, लालच, सामाजिक विकृति न्हंकाः सचेतना थनेगु व धार्मिक आस्थां अलौकिक शक्तिया ज्या याये फइमखु धइगु सन्देश बियातःगु संकिपाय् बिन्की डंगोल, रबिसन महर्जन, किरण महर्जन, सरु महर्जन, शान्ति महर्जन व सानु महर्जनया मुख्य भूमिका दुथ्यानाच्वंगु दु ।
नेपालभाषा संकिपा ख्यःया नांजाःम्ह कलाकार सुरज व्यञ्जनकारं थुगु संकिपापाखें निर्देशन ख्यलय् ‘डेब्यू’ यानादीगु दु । व्यञ्जनकारं न्हापांखुसी निर्देशन यानादीगु संकिपाया छाँयाकन व सम्पादन हरि महर्जनं यानादीगु खः । आजु प्रोडक्सनया न्हापांगु देछा थुगु संकिपा पिक्स प्रोडक्सन स्टुडियोया सहकार्यय् निर्माण जूगु खःसा संकिपाया निर्माण लकडाउन जुयाच्वंगु इलय् याःगु खः ।
LEAVE YOUR COMMENTS