जयवागेश्वर पुनर्निर्माणयात सक्व व लुभुया चा हइगु

येँ (रासस) – भुखाचं क्षति जूगु पशुपति क्षेत्रया जयवागेश्वर देगः पुनर्निर्माणया निंतिं सक्व व लुभुया चा हइगु जूगु दु । भुखाचं दुंगु देगः दुने भैलःद्यःयालिसें थीथी द्यःयाचित्र, स्वंगः गजू दुगु मेगु हे देगःया संरचना लुइवं पुरातत्वविद्, संस्कृतिविद्तय् छगू विज्ञ समिति गठन याःगु खः। थ्व समितिं चाः हे देगः दनेमाःगु सिफारिस याःगु खः । विज्ञतय् सिफारिस कथं देगः दनेत पशुपति क्षेत्र विकास कोषं बांलाःगु चा मालेगु झ्वलय् सक्व व लुभुया चा परीक्षण यानास्वःबलय् थनया चा उपयुक्त जूगुलिं अनं हे चा हे देगः दनेत्यंगु खः कोष निर्देशक भरत मरासिनीं कनादीगु दु ।

कोषया प्रशासकीय अधिकृत सीताराम रिसालं सक्वया बज्रयोगिनी देगःया अप्पा दथुइ च्वंगु चाया परीक्षण यानास्वःगु खँ कनादीगु दु । वय्कलं देगः दनेत माःगु सिँ चूमलानिगुलिं पुनःर्निर्माणया ज्या लिबानाच्वंगु खँ धयादीगु दु। देगःया क्वय् न्हूगु सिँ तयेगु निंतिं सिँ मालाच्वनागु खँ निर्देशक मरासिनीं कनादीगु दु। गौशालां चाबही वनेगु लँ सिथय् लाःगु थ्व देगः पुननिर्माण यायेगु निंतिं थुनाहःबलय् देगः दुने हे हाकनं मेगु स्वंगः गजू दुगु देगः लूगु खः ।

अथेहे भैलःद्यः लिसें थीथी द्यःया अंगःकिपा लुइवं पुरातत्वविदतय् पुचलं अध्ययन याःगु खः । चां देगः दनधाःसां थ्व देगः दुने लूगु अंगःकिपा हाकनं तयेफइगु विज्ञतय् धापू दु । थ्व देगः पुनर्निर्माणया निंतिं स्वंगू करोड १४ लाख तकाया बजेट फ्यानातःगु दु । देगः दनेगु निंतिं तुलसी निर्माण कम्पनीयात ठेक्का बियातःगु दु । आः देगः चां दनेगु जूसां लागतय् छुं हिउपाः मवइगु कोषं धाःगु दु । न्हापा न्हापा जुजु महाराजपिं मंत धायेवं सती वनीपिं लानिपिनिगु तिसावसः फुक्क थन जयबागेश्वरी द्यःयाथाय् छानाथकी धाइ । तर अज्याःगु तिसावसः, सम्पत्तिया आःतक छुं नं अभिलेख मलूनिगु खँ पशुपति क्षेत्रया सम्पदाबारे शोध यानादीम्ह कोषया पुलांम्ह सदस्य सचिव संस्कृतिविद् डा. गोविन्द टन्डनं कनादीगु दु ।

सम्बन्धित बुखँ

LEAVE YOUR COMMENTS