ने. सं. ११४३ तछलाथ्व दशमी -

बेनीइ निसःदँ पुलांगु बर्खे नाचया रौनक

येँ – पश्चिमी नगर बेनी बजारय् बस्ती दुसां निसें नेवाःतय्सं न्ह्याकाच्वंगु ‘बर्खे नाच’ थौंकन्हय् बेनी बजारय् रौनक यानाच्वंगु दु । बेनीया सतक, चुक, बस्ती थौंकन्हय् संस्कृतिमय जुयाच्वंगु दु । कालिगण्डकी व म्याग्दी खुसिया दोभानय् लाःगु बेनी बजारय् बस्ती सुरु जूगु निसः दँ न्ह्यवनिसें हे थ्व प्याखं क्यना वयाच्वंगु विश्वास यानातःगु दु ।

बेनीइ च्वनाच्वंपिं नेवाःतय् नेतृत्वय् थ्व प्याखं आःतक न्ह्यानाच्वंगु दु । गथांमुगः चःह्रे निसें तीज तक यानाः लछि तक न्ह्याःगु थ्व प्याखं थुगुसी नं नेपालभाषा मंकाः खलः म्याग्दीया मूग्वसालय् न्ह्याःगु खः ।

नेवाःतय्सं न्ह्याकाच्वंगु प्याखं खःसां थ्व प्याखनं बेनीया मेमेगु समुदायया नं रौनकता हयाच्वंगु दु । प्रविधिया विकासं बुलुहुँ न्हना वनीगु अवस्थाय् थ्यनेधुंकूगु थ्व प्याखं संरक्षण यायेत स्थानीय संस्कृतिप्रेमीतय्सं कुतः यानाच्वंगु दु । लछि तक प्याखं क्यनेमाःगुलिं कलाकार व्यवस्थापन व ईया व्यवस्थापन यायेगु तसकं हाथ्या दुसां सकसियां ग्वाहालिं आःतक सम्भव जुयाच्वंगु खँ मंकाः खलः म्याग्दीया नायः कृष्णप्रसाद श्रेष्ठं कनादिल ।

बर्खे नाच धकाः लछि तक थीथी प्याखं क्यनेगु याइ । बर्खे नाच अन्तर्गत वंगु वालय् क्यंगु रोपाइँ प्याखंया इलय् फुक्क समुदायया म्हसीका न्ह्यब्वइकथंया प्याखं क्यंगु खः ।

न्हापा मुक्कं नेवाःतय्सं जक क्यना वयाच्वंगु खःसां थौंकन्हय् थ्व प्याखं क्यनेत मेमेगु समुदाययापिं नं जायेगु यानाच्वंगु दु । रोपाइँ प्याखनय् नेवाःत लिसें मगर, छन्त्याल, ब्रम्हू, क्षेत्री, थकाली, दलित लगायतया जातजातितय्त नं दुथ्याकूगु खः ।

ई कथं बर्खे नाचयात समावेशी याना हयेवं थुकी थप रौनकता वःगु खँ स्थानीयतय्सं धाःगु दु । थ्व प्याखनं म्याग्दीया कला व संस्कृति संरक्षणय् सकलें समुदाय एकताबद्ध दुगु सन्देश बीगु खँ धाःगु दु । रोपाइँ प्याखं क्यनेत यक्व कलाकार माःगु व खर्च नं अप्वः जुइगुलिं दँय्दसं क्यनेमफुगु खँ मंकाः खलः अन्तर्गतया ल्यायम्ह पुचःया अध्यक्ष सुविन श्रेष्ठं कनादिल । रोपाइँ नाच थ्वयां न्ह्यः २०७२ सालय् क्यंगु खः ।