भागि यायेगु झीगु संस्कार खः
कल्याण मित्र
परापूर्वकालनिसें न्ह्याना वयाच्वंगु झीगु नेवाः संस्कार दुनेया छगू स्यल्लाःगु चलन व परम्परा खः थः स्वयां थँजिपिंत भागि यायेगु अर्थात अनि यायेगु । कायं मांअबुयात भागि यायेगु । भौमचां माजुबाजु नापं थः स्वयां थकालिपिं थःथितिपिंत भागि यायेगु चलन अतिकं पुलां ।
तर थौंकन्हय्यापिं कायम्ह्याय् व भौमस्तय्सं थः स्वयां थकालिपिंत भागि यायेगु याना महयेधुंकल ।
छगू कथं धायेगु खःसा थ्व चलन बुलुहुं तना वनाच्वंगु दु । गनं गनं गुलिसिनं धाःसा भागि यायेगु चलन अझं ल्यनाच्वंगु खनेदु । अप्वःथें यानाः गां गामय् च्वंपिं नेवाः समुदाय दुने थ्व चलन आतक नं ल्यनाच्वंगु खनेदु । झी न्हियान्हिथं आधुनिक जुया वनेगु झ्वलय् झीसं थुकथंया पुलांगु परम्परा, मान्यता, सभ्यता व चलनत यक्व हे त्वःता वनाच्वनागु दु ।
अज्याःगु गुलिखे पुलांगु चलनत झीगु निंतिं गुलितक फाइदा जू धयागु खँ तकं ल्वःमंका वनाच्वनागु दु । मसिया वनाच्वंगु दु । उकिया थासय् न्हू न्हूगु चलन व न्हू न्हूगु व्यवहार छ्यलाबुलाय् हयाच्वंगु जुल । झीगु पुलांगु परम्परा, चलन व मान्यताकथं काय भौ नं मांअबु व माजुबाजुयात सुथ न्हापां दनेवं इपिं थःगु क्वथाय् द्यनाच्वंगु इलय् हे वनाः पालिइ भ्वपुयाः भागि याइ ।
थ्व परम्परा थः स्वयां थँजिपिं व हनाबना तयेबहपिंत मान सम्मान याःगु दृष्टिकोणं स्वयेगु याइ । थ्व परम्परायात थौंतक नं गुलिखेसिनं न्ह्याका हे वयाच्वंगु दु । थथे छ्यनं हे थियाः भागि यायेबलय् धार्मिक व वैज्ञानिककथं नं झीत यक्व हे फाइदा दु धयागु खँ मसियाः हे झीसं थज्याःगु चलनयात न्हियान्हिथं त्वःता वनाच्वंगु दु ।
झी सकसिनं सिउगु हे खँ खः कि ‘भागि याये ति’ धकाः थकालिया पालिइ थीमाः । जब थुकथं सुनानं झीगु पालि थियाः भागि यात धाःसा झीसं छु यायेमाः ? वयात झीसं आशिका बीमाः । नापं द्यःयात नं लुमंकेमाः । भागि याः वःपिंत झीसं ‘भाग्यमानी जुइमा’, ‘सुख शान्ति दयेमा’ धकाः आशिका बीगु चलन दु ।
थथे आशिका बीबलय् आशिका बीम्ह दुनुगलंनिसें लय् तायाः बीमाः । खास यानाः झीसं झीगु थःगु तुतिं मचायेकं सुयातं मथीमा वा मथ्वायेमा वा मध्वयेमा धकाः कुतः यानाच्वनी । यदि झीगु तुतिं मचायेकं सुयात नं थिल, थ्वात ध्वत धाःसा मभिं जुइगु तायेका च्वनी । झीगु तुतिं सुयातं थिल धाःसा थुकिं झीत दोष लाइ ।
थकालिपिनिगु पालि स्पर्श यानाः नियमित रुपय् भागि यायेबलय् प्रतिकूल जुयाच्वंगु ग्रहत नं अनुकूल जुइ । थुकिया मनोवैज्ञानिक पक्ष थ्व नं दु कि गुगु लक्ष्य प्राप्त यायेगु खः व मनय् तयाः थकालिपिंत भागि यायेबलय् उगु लक्ष्य चूलाकेगु शक्ति प्राप्त जुइ ।
थ्व दोषं बचे जुइत झीसं मनमनं भगवानयाके माफि फ्वनेमाः । अले उम्ह मनूयाके नं माफि फ्वनेमाः । थः स्वयां थकालिपिनिगु पालि थियाः भागि यायेबलय् झीत यक्व हे फाइदा दु । थः स्वयां थकालियात आदर, सत्कार, मान सम्मान यानाः भागि यायेगु अतिकं उत्तम जू धयागु मान्यता दु । भागि यायेबलय् प्रत्यक्ष वा अप्रत्यक्ष कथं नं यक्व हे फाइदा दुगु जुयाच्वन ।
थथे भागि यायेबलय् झीत छु छु फाइदा दु धयागु खँय् नं छक्वः विचाः याये । भागि यायेधकाः पालि थिइगु पूवंक सश्रद्धाकथं थः स्वयां थकालिया न्ह्यःने नतमस्तक जुइगु खः । थुकिं झीत विनम्रता चूलाइ । अले मनय् नं शान्ति जुइ । थुकिया नापं भागि याये धाइम्ह मनुखं थकालियात थःगु आचरणं प्रभावित याये फइगु नं जुल ।
जब झीसं थः स्वयां थँजिम्ह व हनाबना तयेबहःम्ह मनूया पालिइ थिइवं वा भागि यायेवं वय्कलं झीत आशिका बीकथं थःगु निपा ल्हातं झीगु छ्यनय् थियाः ‘भाग्यमानि जुइमा’ धकाः सुवाः बी । थथे जुइबलय् झीगु ल्हातिं वय्कःया पालिइ थियाच्वनी । थुकी थज्याःगु मान्यता दु कि उम्ह हनेबहम्ह मनूया सकारात्मक उर्जा संचार जुयाः आशिकाया रुपय् झीगु म्हय् प्रवेश जुइ ।
थुकिं झीगु अध्यात्मिक व मानसिक विकासय् नं तिबः जुइ ।शास्त्रय् धयातःगु दु कि, ‘झीसं न्हिंन्हिं थकालिपिंत अभिवादन यानाः भागि यायेबलय् झीगु आयु, विद्या, यश व शक्तिइ वृद्धि जुइ ।’ थुकी वैज्ञानिक दृष्टिकोणं स्वयेबलय् नं यक्व हे फाइदा दुगु जुयाच्वन । महान् वैज्ञानिक न्युटनया नियमकथं संसारय् दक्वं चीज गुरुत्वाकर्षणया नियमय् च्वनाच्वंगु दु ।
थुकिया नापं पृथ्वीया गुरुत्वाकर्षणया भार न्ह्याबलें आकर्षित याइम्हपाखे हे वनाच्वनी । झीगु म्हय् नं थ्व हे नियम लागू जुइ । झीगु म्हं छ्यंयात उत्तरी ध्रुव व तुतियात दक्षिण ध्रुव माने यानातःगु दु । गुरुत्वाकर्षणया उर्जा अर्थात चुम्बकीय उर्जा न्ह्याबलें नं उत्तरी ध्रुवं प्रवेश यानाः दक्षिण ध्रुवय् प्रवाहित जुयाः थःगु चक्र पूवंकाच्वंगु दइ ।
थथे धइगु झीगु म्हया उत्तरी ध्रुव छ्यनय् सकारात्मक उर्जा दुहां वनाः दक्षिण ध्रुव पालिइ प्रवाहित जुयाच्वनी । दक्षिण ध्रुवय् थ्व उर्जा असीमित मात्राय् स्थिर जुयाच्वनी अले पालि उर्जाया केन्द्र जूवनी । पालिइ ल्हातिं थियाः उगु स्थिर जुयाच्वंगु उर्जा ग्रहण यायेगुयात हे झीसं भागि यायेगु, अनि यायेगु वा चरण स्पर्श यायेगु धाइ ।
वास्तवय् थ्व झीगु तसकं पुलांगु छगू संस्कार खः । मेमेगु जातियापिंसं नं थ्व संस्कार न्ह्याका वयाच्वंगु दु । द्यःपिनिगु पालंनिसें हे थ्व चलन दु धइगु खँ झीसं शास्त्रय् ब्वना वयाच्वनागु हे दु । गथेकि महाद्यः छेँय् लिहां वइबलय् पार्वतीं कमण्डलुइ लः हयाः महाद्यःया पालि छगः बाताय् तयाः सिकेगु याइ, अले व बाताय् मुनाच्वंगु लः थम्हं त्वनेगु याइ ।
थ्व हे कथं ऋषिमुनि व खय्ब्रम्हूतय् नं थज्याःगु चलन दुगु खः । थज्याःगु ज्यायात थौंकन्हय्यापिंसं थ्व सामन्ती संस्कार खः, मिसा अधिकारया हनन् खः धायेगु याः । तर थुकी नं वैज्ञानिक ल्याखं स्वयेगु खःसा लाभदायक हे जू । छाय्धाःसां गुलि नं शक्तिशाली उर्जा दु, व सकारात्मक उर्जा व फुक्क पालिइ मुनाच्वनी ।
न्हिछियंकं मुनाच्वंगु उर्जा प्राप्त जुइगुलिं हे कलाःम्हं भाःतया तुति सिलाः उकिया लः भचा त्वनेगु खः ।पालि थियाः भागि यायेबलय् पालिइ च्वंगु उर्जां झीत यक्व हे फाइदा जुयाच्वनी । तुतिया पतिंचाय् नं यक्व हे उर्जा प्रसारित यायेगु शक्ति दयाच्वनी । थज्याःगु नं मान्यता दु कि थकालिपिनिगु पालि स्पर्श यानाः नियमित रुपय् भागि यायेबलय् प्रतिकूल जुयाच्वंगु ग्रहत नं अनुकूल जुइ ।
थुकिया मनोवैज्ञानिक पक्ष थ्व नं दु कि गुगु लक्ष्य प्राप्त यायेगु खः व मनय् तयाः थकालिपिंत भागि यायेबलय् उगु लक्ष्य चूलाकेगु शक्ति प्राप्त जुइ । अथेला ‘भागि याये’ धाःपतिकं थकालिपिंसं ‘भाग्यमानी जुइमा’ धकाः आशिका नं बियाच्वनीगुलिं नं सकारात्मक सोचया विकास जुयाच्वनी ।थ्व छगू कथं सुक्ष्म व्यायाम नं खः ।
तुतिइ थीबलय् शारीरिक कसरत नं जुइ । क्वछुनाः तुति थीबलय् म्ह लचकदार जुइ । न्ह्यःने क्वछुइबलय् छ्यनय् रक्त प्रवाह अप्वइ । गुकिं स्वास्थ्यया निंतिं फाइदा जुइ । भागि यायेबलय् छगू फाइदा थ्व नं दु, थुकिं झीके दुगु अहंकार म्हो जुइ । थथे धइगु झीगु म्हय् दुगु नकारात्मक उर्जा म्हो जुया वनी ।
थ्व हे कारणं झी पुर्खातय्सं हनेबहपिं थकालिपिंत भागि यायेमाःगु परम्परा व संस्कारया रुप बियातःगु खः । आः वयाः झी नेवाःतय्सं भागि यायेगु पलेसा ‘ज्वज्वलपा’ धायेगु यानाहल । तर भागि यायेधकाः छ्यं क्वछुकीपिं नेवाः भौमस्तय् ल्याः नं म्हो मजू । गनं सभा समारोह, भ्वजय् वा छुं नं ज्याझ्वलय् नेवाःतय् थःथितिपिं मुनेगु ज्या जुल धाःसा अन थःगु छ्यं क्वछुकाः थकालिपिंत भागि याये धाइपिं नेवाः अझं यक्व दनि । थ्व संस्कारयात ल्यंका तये ।
LEAVE YOUR COMMENTS