प्रदेश १ य् लाखे धेंधेंबल्लाः

येँ – चैनपुरय् आः नकतिनि लाखे प्याखं धेंधेंबल्लाः कासा क्वचाःगु दु । चैनपुरया तिंख्यलय् स्वन्हु तक उगु लाखे प्याखं धेंधेंबल्लाः कासा जूगु खः । थुगुसी अन प्रदेश नं. १ व्यापी लाखे कासा याःगु खः । प्रदेश १ य् लाःगु १४ गू जिल्लां उकी ब्वये काये फइगु खःसां चैनपुर पहाडी लागा जूगु व अन वनेत बांलाःगु लँया नं व्यवस्था मदुगु जुयाः मुक्कं ७ गू जक जिल्लापाखें मुक्कं १३ गू थ्वलं ब्वति काःगु खँ ग्वसाः खलकं धाःगु दु ।

लाखे प्याखं धेंधेंबल्लाः कासा चैनपुर समाज सेवा सेवा युवा क्लब व नेवाः देय् दबू चैनपुर नगर समितिया मंकाः ग्वसालय् जूगु खः । कासाय् गाइघाट उदयपुरया झीगु पुचःपाखें न्ह्यब्वःगु लाखे प्याखं न्हाप लाःगु खःसा भोजपुरया अमृत तिनधारा लाखे समाज लिउ, संखुवासभाया सिबुआ लाखे समाज लियांलिउ व धरानया पासा खलःयात हःपाः सिरपाः लाःगु खः ।

कासाय् न्हापयात ५५,५५५ तका, लिउयात ३३,३३३ तका, लियां लिउयात २२,२२२ तका व हःपाःयात ११,१११ तका दां सिरपाः लाःगु खः ।अन न्ह्यब्वयेहःगु लाखे प्याखंया वसः व हुलेगु पहः समान खनेदुसां बाजं धाःसा तसकं फरक फरक कथं थाना वःगु खः ।

कासाया निर्णायक मण्डलय् च्वनादीम्ह वरिष्ठ संस्कृतिविद् डा. चुन्दा वज्राचार्यं ‘नेपालभाषा टाइम्स’यात कनादी कथं अन झ्याली व धोलकंनिसें कयाः ड्रम तकं थानाः लाखे प्याखं हुइकूगु खः ।