भारतय् नं खनेदत बेलायती भाइरस

एजेन्सी – बेलायतय् खनेदुगु कोरोनाया न्हूगु ताजिया भाइरस भारतय् नं खनेदुगु दु । भारतय् म्हिगः खुम्हेसिके थ्व न्हूगु भाइरस खनेदुगु पुष्टि जूगु दु । भारतीय सरकारं उमित स्वास्थ्य केन्द्रय् क्वारेन्टाइनय् तयातःगु दुसा उपिं लिसे सम्पर्कय् वःपिनि नं जाँच जुयाच्वंगु खँ धाःगु दु। भारतं वंगु वालय् हे बेलायतलिसेया उडान सेवा त्वाःथले धुंकूगु खः ।

भारत थौंकन्हय् अथें नं अमेरिका धुंकाः दकलय् अप्वः कोरोना संक्रमितत दुगु देय् जुयाच्वंगु दु । वंगु महिनाय् बेलायतं ३३ हजारं मल्याक मनूत भारतय् दुहां वःगु तथ्यांक दु। थुपिं मध्ये ११४ म्हेसिके कोरोना पोजिटिभ खनेदुगु खःसा खुम्हेसिके न्हूगु भाइरस खनेदुगु खः । थ्व न्हूगु ताजिया भाइरस तसकं याकनं सरे जुइगु भाइरस खः । थ्व भाइरस क्यानडा, जापान, स्पेन, स्वीडेन व फ्रान्सय् नं खनेदयेधुंकूगु दु ।

बेलायतय् थ्व भाइरस तसकं याकनं याकनं न्यना वनाच्वंगु दु। सोमवाः तकया दुने हे जक ४१ हजार ३८५ म्हेसिके संक्रमण खनेदयेधुंकूगु दु। भारतय् थ्व भाइरस दुहांवयेधुंकाः थुकिं अनया स्वास्थ्य सेवा प्रणालीयात हे अस्तव्यस्त यानाबीगु चिन्ता प्वंकाहःगु दु ।